Reënboogbeker van die baan

Marizanne Kok – Daar is geen pot goud aan die einde van dié reënboog nie . . . Die vier Suid-Afrikaanse franchises se voorbereiding vir die Reënboogbeker-reeks was skynbaar pure verniet, met die Suid-Afrikaanse Rugbyunie (Saru) en die Pro14-ringkoppe in Europa wat na verneem word op die punt staan om aan te kondig dat die Haaie, Stormers, Leeus en Bulle nie meer in dié kompetisie sal speel nie.
Netwerk24 verneem dat daar weens die internasionale reisverbod op Suid-Afrikaanse reisigers geen kans meer is dat die land se rugbyspelers Europa toe kan gaan vir hul Reënboogbeker-wedstryde daar nie. Daar is dus geen sin daarin om voort te gaan met die plaaslike derbies (wat beplan is vir die eerste drie rondes van die kompetisie) nie.
Die eerste van dié derbies sou Vrydagaand in Kaapstad tussen die Stormers en Haaie plaasgevind het, gevolg deur ’n stryd Saterdag op Loftus Versfeld tussen die Bulle en Leeus.
Luidens ’n berig op IOL het die Haaie egter nie reisreëlings vir hul Vrydag-wedstryd getref nie. Die Stormers, Leeus en Bulle was wel almal Dinsdagoggend nog op die oefenveld.
’n Amptelike verklaring oor die toekoms van die Reënboogbeker-reeks word Woensdag verwag. Volgens ’n Ierse webblad, The42, sal die 12 Europese spanne in die kompetisie steeds voortgaan met hul beplande wedstryde, maar in Suid-Afrika en Wallis is berig dat die kompetisie in sy geheel geskrap gaan word.
Die wolk oor die plaaslike franchises is darem nie te donker nie, met Saru wat reeds besig is om ’n plaasvervanger-reeks te reël.
Rapport het twee weke gelede berig dat die vier Pro-spanne daarin teen die Cheetahs, Pumas, Griekwas en Oostelike Provinsie sal speel. As dit ’n werklikheid word, sal dit veral goeie nuus vir laasgenoemde vier spanne wees, aangesien daar nie tans duidelikheid is oor wanneer hulle terug op die speelveld sal kom nie.
Die land se rugby-ringkoppe het ’n Plan B op ys omdat daar vir weke al onsekerheid oor die Reënboogbeker heers. Daar was juis verlede week ook gerugte dat die reeks gekanselleer sou word, maar Saru het dit ontken en voortgegaan met sy planne vir die eerste drie rondes terwyl gewag is vir uitsluitsel oor die oorsese wedstryde.
’n Kompetisie van enige aard is natuurlik van kardinale belang vir Suid-Afrika se spelers, met die Britse en Ierse Leeus se toer na Suid-Afrika nou net meer as twee maande weg. ’n Gebrek aan speelkans kan nie bekostig word nie, omdat dit die Springbokke se plaaslike spelers halfgebak sal laat. – Netwerk24



FOTO
Suid-Afrika se vier deelnemers aan Pro-rugby sal mekaar nie meer van hierdie naweek af in die Reënboogbeker-reeks die stryd aansê nie. Foto Gallo Images