Reën val wyd

Tanja Bause – Plekke oor die land heen het die naweek weereens baie goeie reën gekry.Verskeie riviere het geloop en die hoofpad tussen Otavi en Tsumeb was Vrydag vir ’n tyd gesluit vir gewone voertuie weens die massas water wat sterk oor die pad gestroom het. Dié water is in die opvangsgebied en op pad na die Ugabrivier, wat tans ook in vloed is. Die Omatako- en die Omarumbo Ovamborivier net anderkant Tsintsabis op die D3016 was ook Vrydag in vloed, volgens plasings op die Facebookblad “Reën in Namibia”. Volgens mnr. Pieter Bezuidenhout moes hulle omdraai omdat die water bykans 200 meter breed oor die pad geloop het. ’n Klein rivier sowat 20 km onderkant die Spreetshoogtepas het ook Vrydag geloop en mense moes wag totdat die ergste afgeloop het voordat hulle kon deurry. Dié water is op pad Sossusvlei toe. Die hoofstad het die naweek ook sterk buie reën ontvang met mense wat Vrydag 26 mm in Hochlandpark gemeet het. Saterdag is 30 mm in Pionierspark, 22 mm in Academia, 30 mm in Klein Windhoek en 20 mm in Windhoek-Wes aangemeld. Die Out of Nature Country Lodge tussen Windhoek en Rehoboth het 50 mm ontvang. Dit bring hul totale reënsyfers sedert Kersfees op 386 mm te staan, het me. Christine Haas op die genoemde Facebookblad gesê. Volgens me. Elizabeth van Druten van die plaas Emilienhof naby Tsumeb het hulle van die begin van November reeds 908 mm ontvang en dit reën nog steeds. Grootfontein het 83 mm en die Hardapskema by Mariental 80 mm Saterdag ontvang.Ook in die verre Suide het ’n reënstorm by Goageb tussen Keetmanshoop en Aus uitgesak. Volgens me. Jessica Kemper was daar ook talle kleiner reënbuie tussen Keetmanshoop en Aus. By die Dikke Willem berg by Garub waar die wilde perde voorkom, het dit ook gereën. – tanja@republikein.com.na

Reën val wyd

Kommentaar

Republikein 2026-02-03

Meld asseblief aan om kommentaar te lewer

Reën val wyd

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.