Reën blus laaste vlamme op Tafelberg

Die ligte reën wat laat Saterdagmiddag oor Kaapstad begin val het, het gehelp om die laaste vlamme op Tafelberg te blus, het SANParke vroeg gister bevestig. Merle Collins, streekskommunikasiebestuurder van SANParke, sê brandspanne wat oornag gewerk het, het berig die reën het ’n positiewe impak gehad, en dat nuwe spanne wat vroegoggend uitgestuur is, sal seker maak dat al die vlamme geblus is. Die brande het Woensdagmiddag by Oudekraal begin woed. Sterk warrelwinde het Vrydag amok gemaak en veroorsaak dat dit byna onmoontlik was om te bepaal waarheen die vlamme volgende gaan versprei. Die 12 Apostles Hotel en Spa in Victoriaweg is Donderdag ontruim nadat die vlamme so na as 50 m van die hotelgeboue gedraai het. Foto Netwerk24