Reho-selfdood ná beweerde geweld

Denver Kisting



Die 47-jarige mnr. Jan Windstaan, wat Sondagoggend sy eie lewe op Rehoboth geneem het, het glo die vorige aand sy vrou, me. Magreth Windstaan, met 'n mes toegetakel.

Twee seuns van onderskeidelik 13 en 14 jaar oud het Sondag omstreeks 08:00 op Jan Windstaan se oorskot afgekom.

Dié tieners was glo op pad om brood te gaan koop in Blok E, 'n buurt aan die buitewyke van Rehoboth, toe hulle op die oorskot afkom wat in 'n boom hang.

Luidens 'n voorvalverslag het die seuns na 'n pastoor gehardloop sodat hy hulp kon ontbied.

Met hul aankoms by die toneel het die polisie die oorskot aangetref – geklee in 'n groen broek, 'n ligblou T-hemp met pers en wit strepe en wit tekkies met blou strepe.

Die oorledene is later as Jan Windstaan geïdentifiseer, lui die verslag.

Me. Windstaan het na wat verneem word aan die polisie onthul dat die egpaar ten tye van die voorval nie met mekaar gepraat het nie.

Die vorige aand, omstreeks 21:00, het 'n rusie tussen die egpaar ontstaan, waartydens die oorledene na bewering sy vrou verskeie kere met 'n mes gesteek het.

Hy was glo onder die indruk dat hy haar doodgesteek het “so, toe neem hy 'n tou en gaan neem sy eie lewe.”

Luidens die verslag het die rusie ontstaan nadat die man verneem het sy vrou het na bewering buite-­egtelike verhoudings gehad terwyl hy op 'n plaas gewerk het.

Mnr. Windstaan het geen selfdoodbrief agtergelaat nie.

Sy naasbestaandes is van sy dood ingelig.– [email protected]