Regtegroepe teiken polisie- en spioenasiehoofde met nuwe wet

Praag/Washington – Polisie- en spioenasiehoofde van China tot in die Midde-Ooste, 'n Oekraïense oligarg en 'n voormalige president van Panama is onder die mense teen wie 'n koalisie van menseregtegroepe sanksies ingestel wil hê ingevolge uitgebreide Amerikaanse wetgewing om vergrype en korrupsie wêreldwyd te verminder.In dokumente wat gister openbaar gemaak sou word, het die koalisie 15 sake aan die VSA se ministeries van buitelandse sake en finansies voorgelê. Die koalisie versoek ondersoeke om vas te stel of stappe ingevolge die Wêreldwye Magnitsky-wet geneem kan word.“Die sake wat ons gekies het om uit te sonder kom uit elke streek van die wêreld en behels grusame verhale van marteling, gedwonge verdwynings, moord, verkragting, afpersing en omkopery,” het die koalisie bestaande uit 23 groepe in 'n brief aan die ministers Rex Tillerson en Steven Mnuchin geskryf. Volgens die groepe is hul inligting gebaseer op eerstehandse getuienis deur slagoffers, hul regslui, ondersoekende joernalistiek en verslae deur nieregeringsorganisasies (NGO's).Die name van polisie- en veiligheidshoofde, asook aanklaers in Bahrein, China, Egipte, Saoedi-Arabië, Mexiko en lande in Sentraal-Asië waar aangehoudenes gemartel, tereggestel is of in aanhouding gesterf het, verskyn op die lyste. Human Rights First in Washington koördineer die aansoeke.Griewe is ook teen China se adjunkminister van openbare veiligheid, Fu Zhenghua, en die adjunkhoof van Beijing se munisipale buro vir openbare veiligheid, Tao Jing, gelê. Die twee beamptes was volgens die koalisie in bevel tydens die marteling en dood van die menseregteaktivis Cao Shunli in 2014.Dmitry Firtash, 'n Oekraïense oligarg wat in 2013 in die VSA van omkopery en ander oortredings aangekla is, is ook op die lys. 'n Ander teiken is die voormalige Panamese president, Ricardo Martinelli. Hy is tans in die tronk in Florida en staar uitlewering aan Panama in die gesig vir beweerde onwettige sekuriteitsoperasies en die diefstal van staatsgeld. Martinelli het by herhaling die klagte ontken. President Donald Trump het in April aan die Amerikaanse kongres gesê die Magnitsky-wet moet “robuust en deeglik” toegepas word. Die Trump-regering het nog nie sanksies of belettings om te reis met die wetgewing ingestel nie, maar volgens 'n amptenaar is optrede teen talle persone reeds van “binne en buite” voorgestel. - Nampa/Reuters

Regtegroepe teiken polisie- en spioenasiehoofde met nuwe wet

Kommentaar

Republikein 2025-11-05

Meld asseblief aan om kommentaar te lewer

Regtegroepe teiken polisie- en spioenasiehoofde met nuwe wet

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.