Regsvereniging kry bloedneus

Denver Kisting – Die Teenkorrupsiekommissie (ACC) en die Sentrum vir Finansiële Intelligensie (FIC) is onder skoot vir hoe die saak teen mnr. Sisa Namandje, ’n gesiene plaaslike prokureur, in duie gestort het.Mnr. Eben de Klerk, ook ’n plaaslike prokureur, het nadat die Regsvereniging van Namibië (LSN) Vrydag bloedneus gekry het in die Windhoek-hoërhof, gesê die ACC en die FIC het hul pligte versuim.Hy sê behalwe dat hulle nie hul werk gedoen het nie, het hul hul pligte op die LSN gestort. Namandje, ook pres. Hage Geingob se persoonlike regsverteenwoordiger, het Vrydagmiddag gehoor hy hoef nie sy praktyk se boeke vir inspeksie oop te gooi nie.Dít kom nadat regter Herman Oosthuizen die aansoek deur die LSN van die hand gewys het.Oosthuizen het ook gelas die LSN moet pa staan vir Namandje se regsonkoste.Volgens die regter was die LSN se aansoek nie op ’n behoorlike raadsbesluit geskoei nie.Oosthuizen se uitspraak lui dat ’n uittreksel van ’n raadsvergadering van 24 Januarie vanjaar, waartydens besluite glo geneem is rakende ’n ondersoek na die bedrywighede van ’n LSN-lid en ’n regsfirma, as gesag voorgehou is. Die regter sê nêrens in dié uittreksel is daar enige verwysing na ’n redelike veronderstelling deur die raad dat Namandje en kie skuldig is aan onbehoorlike gedrag nie.Trouens, sê hy, die notule toon raadslede het – teenstrydig met die wet – nie ’n besluit geneem om stappe te doen nie en dít eerder op die LSN-direkteur afgeskuif.Aangesien die wet nie voorsiening maak vir wanneer ’n kworum nie gevorm is omdat raadslede óf afwesig óf botsende belange het, kon die twee oorblywende lede wat gevolglik tydens Januarie se vergadering oor was, nie ’n wettige besluit neem nie, lui Vrydag se bevinding.KommentaarDie LSN het Saterdag by navraag by monde van sy regsverteenwoordiger, me. Uno Katjipuka-Sibolile, gesê dit is te vroeg om te bepaal of hulle teen die bevinding appèl sal aanteken.Volgens haar sal hulle die uitspraak deeglik bestudeer voor hulle oor die weg vorentoe besluit.Op sy beurt het Namandje gesê: “Ek het dit nie gevolg nie. Ek is in die Noorde, waar ek rou oor my skoonma wat verlede naweek gesterf het. So, geen kommentaar nie.”AgtergrondNamandje en die LSN was in Junie vanjaar vir twee dae in ’n hewige stryd voor Oosthuizen gewikkel.Katjipuka-Sibolile wou namens die LSN toegang hê tot Namandje se boeke omdat dié regulatoriese liggaam vermoed die prokureur se trustrekening kon vir onregmatige doeleindes aangewend gewees het.Adv. Raymond Heathcote, SC, het namens Namandje gesê die LSN oorskry met dié aansoek hul magte.Trouens, wat dié liggaam probeer vermag, behoort ongrondwetlik te wees, het Heathcote volgehou.Dit druis volgens hom in teen die Grondwet se bepalings oor privaatheid.’n Dokumentêre program op Al Jazeera en ’n beweerde ondersoek deur die FIC het die LSN onraad laat vermoed, het Katjipuka-Sibolile gesê.Dié program het grootskaalse beweerde plundery van Namibiese viskwotas ten bedrae van etlike miljoene dollar aan die kaak gestel.Dit het daartoe gelei dat twee kabinetsministers, mnre. Bernhard Esau en Sacky Shanghala, verlede jaar bedank het.Hulle is sedertdien saam met mnre. James Hatuikulipi, Tamson Hatuikulipi, Ricardo Gustavo en Pius Mwatelulo, weens dié skandaal in hegtenis geneem.Die mans is aanvanklik by die polisiekantoor op Seeis aangehou maar word tans by die Windhoek Sentrale Gevangenis gehuisves.Verskeie pogings om op borgtog vrygelaat te word, het tot dusver misluk. - denver@republikein.com.na

Regsvereniging kry bloedneus

Kommentaar

Republikein 2025-06-18

Meld asseblief aan om kommentaar te lewer

Regsvereniging kry bloedneus

Kommentaar

Republikein 2025-06-18

Meld asseblief aan om kommentaar te lewer

MELD AAN

Advertensie