Regskenner waarsku oor sosiale media

Yochanaan Coetzee - Ernstige regsimplikasies kan voortspruit uit boodskappe of beelde wat mense op sosiale media plaas en negatiewe implikasies in die werklike wêreld kan hê.Dit was die kernboodskap van me. Emma Sadleir, 'n Johannesburgse sosiale media-regskenner, wat Woensdag 'n lesing met die tema "Die Wetlike Dissiplinêre en Reputasierisiko's van Sosiale Media" in Windhoek gegee het. Sadleir het Namibië op uitnodiging van Standard Bank besoek."Aanvanklik het ek mense aangeraai om as hulle nie 'n sekere boodskap op 'n massiewe advertensiebord met hul foto en alle inligting sal plaas nie, moet hulle dit ook nie aanlyn doen nie. Maar nou het dit verander: As jy dit nie op 'n advertensiebord sal plaas nie, moet dit nie op jou digitale toestel sit nie," het Sadleir gesê.Haar werk behels die skepping van sosiale media-strategieë en -beleide vir korporasies en skole, asook die opstel van sosiale media-agentskapooreenkomste en die verskaffing van opleiding en werkswinkels oor sosiale media-wetgewing.Sy het gesê digitale toestelle soos slimfone is gevaarlik omdat hulle drie eienskappe het: Die internet, skermkiekies en 'n kamera. Die internet bied 'n permanente openbare platform, skermkiekies lewer permanent deurlopende kommunikasie en kameras dokumenteer alles. Sodra die inhoud op die digitale toestelle is, kan dit deur verskeie sosiale media-webwerwe verkry word of die risiko loop om deur kuberkrakers gesteel te word.In die verlede was mense net gedurende werksure bekommerd oor hul gedrag op kantoor, maar hulle moet nou ook bekommerd wees oor hul aanlyn aktiwiteite, het Sadleir beklemtoon. Werkgewers kan dié sosiale media-inligting gebruik om dissiplinêre stappe teen hul werknemer te doen, selfs al is dit in persoonlike hoedanigheid geplaas. Regsaksie kan ook geneem word deur diegene wat deur die plasings geraak word.Stem vir almal"Die beste van sosiale media is dat dit vir almal 'n stem gee en die slegste van sosiale media is dat dit vir almal 'n stem gee," het sy gesê. Sy het daarop gewys dat almal op sosiale media in hul eie reg 'n bekende persoon geword het.Sadleir het gesê indien enige inhoud aanlyn geplaas word en slegs deur een persoon gesien word, is die regsimplikasies dieselfde as met iets wat op die voorblad van 'n koerant geplaas is. Kwessies van privaatheid, laster of onwettige verspreiding van pornografiese materiaal kom ook in die spel.Sy het verder daarop gewys dat mens konteks, toon en beheer oor jou gehoor verloor as jy aanlyn is. As jy iets onwettig of onwelvoeglik doen, kan dit gedokumenteer en aanlyn geplaas word, al was dit bedoel as 'n grap, wat tot regs- en dissiplinêre optrede kan lei.Alhoewel sommige mense meen hul reg tot privaatheid word in sommige gevalle op sosiale media oortree, het Sadleir verduidelik dat tensy hulle 'n redelike verklaring oor privaatheid gestel het, kan probleme rakende toestemming en openbare belang aangewend word om daardie argument teen te werk."As jy nie let op jou privaatheid nie, het jy nie ’n redelike verwagting van privaatheid nie. As jy nog nooit op sosiale media was nie, het jy 'n hoër verwagting van privaatheid as iemand wat is," het Sadleir benadruk.Daar is twee dinge om op sosiale media in ag te neem: Jou digitale voetspoor en jou digitale skaduwee. Die digitale voetspoor is wat jy oor jouself aanlyn plaas, wat dit maklik maak om te beheer, en die digitale skaduwee is wat ander mense oor jou plaas, wat moeilik is om te beheer. Wat vandag privaat is, sal nie môre privaat wees nie, het sy gesê. As jy dus nie toestemming gee vir 'n plasing of jy wil nie daarmee geassosieer word nie, moet jy dit baie duidelik verklaar en vra dat dit verwyder word."Alle wette wat in die werklike lewe van toepassing is, is van toepassing op sosiale media. Dit geld ook vir professionele kodes, nywerheidsregulasies en kontraktuele verpligtinge. Ongelukkig word ons 'n geslag van digitale inboorlinge wat net van die lewe aanlyn weet, sonder om te weet dat hierdie aanlyn aktiwiteite hulle in die moeilikheid in die werklike lewe kan kry," het sy gesê."Jy is verantwoordelik vir alles op jou sosiale media, selfs al het jy dit nie self geskryf nie, omdat jy die mag het om dit te verwyder as jy nie daarmee saamstem nie. Ons moet soos die bekende persoonlikhede onsself aanlyn beskerm. Jou persoonlike veiligheid moet eerste kom," het Sadleir gesê.

Regskenner waarsku oor sosiale media

Kommentaar

Republikein 2025-09-17

Meld asseblief aan om kommentaar te lewer

Regskenner waarsku oor sosiale media

Kommentaar

Republikein 2025-09-17

Meld asseblief aan om kommentaar te lewer

MELD AAN

Advertensie