Registrasie eindig vandag
Denver Kisting – Laatslapers wat nog nie geregistreer het nie en nie teen 19:00 vandag by 'n registrasiepunt in hul kiesafdeling is nie, sal nie op 25 November vanjaar aan die plaaslikeowerheids- en streekraadsverkiesings deelneem nie.
Die Verkiesingskommissie van Namibië (ECN) het gistermiddag by monde van sy woordvoerder, me. Lina Ndengu, gesê daar is nog geen planne om die aanvullende registrasietydperk wat vandag ten einde loop, te verleng nie.
Sou so 'n besluit wel geneem word, sal dit vandag eers gekommunikeer word, het sy by navraag gesê.
Dít kom nadat verskeie politieke leiers die afgelope week gesê het agt dae is nie voldoende nie.
Mnr. McHenry Venaani, leier van die Popular Democratic Movement (PDM), het verlede week op 'n nuuskonferensie in die hoofstad te velde getrek teen die agt dag lange proses.
Mnr. Graham Hopwood, die uitvoerende direkteur van die Instituut vir Openbare Beleidsnavorsing (IPPR), het gister gesê dit sal wys wees om die registrasie tot minstens Vrydag te verleng.
“Die ECN het nie die data vrygestel om aan te dui wat hul verwagting is wat getalle betref nie, d.w.s. hoeveel Namibiërs het 18 geword sedert Julie 2019, hoeveel mense uitgelaat is verlede jaar, ensovoorts. So, dit is moeilik om te weet of daar baie mense is wat uitgelaat is. Ek dink egter dit sal wys wees om tot Vrydag uit te stel om te verseker dat almal 'n kans gegun is om te stem.”
Naas mense wat nog nooit tevore geregistreer het nie, maak die huidige proses voorsiening vir diegene wie se vanne verander het, diegene wat verhuis het en dié wie se kieskaarte beskadig of verlore is.
Mnr. Theo Mujoro, die hoofkiesbeampte, sê ongeveer 96 247 stemgeregtigde Namibiërs het tussen 7 en 12 September aan die proses deelgeneem.
Van dié getal is 34 270 nuwe voornemende kiesers wat vir die eerste keer registreer, sê hy. “Die verskil is mense wat registreer weens 'n verandering van adres en die vervanging van verlore of beskadigde kieskaarte.”
Volgens die kieskalender vir 2020 sal 'n voorlopige kiesersregister tussen 30 September en 5 Oktober by strategiese plekke in alle kiesafdelings en plaaslike owerhede vertoon word, sê Mujoro.
Ndengu het gister gesê hulle het nog nie die afgelope naweek se registrasiesyfers verreken nie.
Die ECN sal ná afloop van die proses omvattende besonderhede bekend maak, het sy gesê.
– [email protected]
Die Verkiesingskommissie van Namibië (ECN) het gistermiddag by monde van sy woordvoerder, me. Lina Ndengu, gesê daar is nog geen planne om die aanvullende registrasietydperk wat vandag ten einde loop, te verleng nie.
Sou so 'n besluit wel geneem word, sal dit vandag eers gekommunikeer word, het sy by navraag gesê.
Dít kom nadat verskeie politieke leiers die afgelope week gesê het agt dae is nie voldoende nie.
Mnr. McHenry Venaani, leier van die Popular Democratic Movement (PDM), het verlede week op 'n nuuskonferensie in die hoofstad te velde getrek teen die agt dag lange proses.
Mnr. Graham Hopwood, die uitvoerende direkteur van die Instituut vir Openbare Beleidsnavorsing (IPPR), het gister gesê dit sal wys wees om die registrasie tot minstens Vrydag te verleng.
“Die ECN het nie die data vrygestel om aan te dui wat hul verwagting is wat getalle betref nie, d.w.s. hoeveel Namibiërs het 18 geword sedert Julie 2019, hoeveel mense uitgelaat is verlede jaar, ensovoorts. So, dit is moeilik om te weet of daar baie mense is wat uitgelaat is. Ek dink egter dit sal wys wees om tot Vrydag uit te stel om te verseker dat almal 'n kans gegun is om te stem.”
Naas mense wat nog nooit tevore geregistreer het nie, maak die huidige proses voorsiening vir diegene wie se vanne verander het, diegene wat verhuis het en dié wie se kieskaarte beskadig of verlore is.
Mnr. Theo Mujoro, die hoofkiesbeampte, sê ongeveer 96 247 stemgeregtigde Namibiërs het tussen 7 en 12 September aan die proses deelgeneem.
Van dié getal is 34 270 nuwe voornemende kiesers wat vir die eerste keer registreer, sê hy. “Die verskil is mense wat registreer weens 'n verandering van adres en die vervanging van verlore of beskadigde kieskaarte.”
Volgens die kieskalender vir 2020 sal 'n voorlopige kiesersregister tussen 30 September en 5 Oktober by strategiese plekke in alle kiesafdelings en plaaslike owerhede vertoon word, sê Mujoro.
Ndengu het gister gesê hulle het nog nie die afgelope naweek se registrasiesyfers verreken nie.
Die ECN sal ná afloop van die proses omvattende besonderhede bekend maak, het sy gesê.
– [email protected]
Kommentaar
Republikein
Geen kommentaar is op hierdie artikel gelaat nie