Regering 'trek nié Chinese voor'

Estelle de BruynMinisters het vandeesweek in die Nasionale Vergadering (NV) wal gegooi teen beweringe dat die regering hom blind hou vir die manier waarop werkspermitte aan Chinese werkers, veral dié in die konstruksiebedryf, toegeken word.Die adjunkminister van binnelandse sake en immigrasie, mnr. Erastus Uutoni, het Dinsdag daarop gewys dat 'n immigrasiekeurraad besluit oor die toeken van werks- en verblyfpermitte. Die keurraad bestaan uit verteenwoordigers van die ministerie van binnelandse sake en immigrasie, die kantoor van die president en die ministeries van nywerheidsontwikkeling, handel en SME-ontwikkeling; veiligheid en sekuriteit; arbeid, nywerheidsbetrekkinge en werkskepping; hoër onderwys, opleiding en vernuwing asook justisie.Hy het verduidelik dat 'n sekretariaat in die ministerie aansoeke vir visums en permitte voorberei en aan die keurraad voorlê.“Daar is 'n wanopvatting dat die keurraad permitte aan semikundige buitelanders toestaan. “Dit kan gebeur weens wanvoorstellings van feite omdat individuele aansoekers nie self voor die keurraad vir ondervraging verskyn nie. Gevolglik gaan die keurraad bloot in op die feite wat voorgelê word,” het Uutoni gesê.Op sy beurt het die minister van arbeid, nywerheidsbetrekkinge en werkskepping, mnr. Erkki Nghimtina, gesê 'n ondersoek na die konstruksiebedryf het aan die lig gebring dat sommige konstruksiemaatskappye, insluitende maatskappye van Chinese, Duitse, Namibiese en Suid-Afrikaanse oorsprong of gesamentlike ondernemings, nie aan die bepalings van arbeidswetgewing voldoen nie, terwyl ander dit wel doen. Hy het die voorbeeld genoem van 'n konstruksiemaatskappy in Chinese besit wat 'n inkoopsentrum op Rundu opgerig het. Tydens 'n ministersbesoek aan die bouterrein is ernstige skendinge van die wet aan die lig gebring. Die ministerie het 'n nakomingsbevel uitgereik en die kontrakteur opdrag gegee om die werk te staak totdat aan die wet voldoen is. Verlede jaar is 'n Chinese maatskappy wat die polisiehoofkantoor opgerig het, ook aangesê om werk te staak omdat skendings van die arbeidswet op die perseel onder die ministerie se aandag gekom het. Hy het ook daarop gewys dat 'n gesamentlike Namibies-Chinese onderneming vroeër die tender vir oprigting van 'n SME-sakenaaf op Omahenene verloor het omdat dit nie die toepaslike wette nagekom het nie.Gevolglik, sê Nghimtina, dit is nie waar dat die regering nie teen Chinese oortreders optree nie. Hy het daarop gewys dat die Arbeidswet van 2007 tans hersien word met die oog daarop om skuiwergate uit die weg te ruim en wysigings aan te bring.Inspeksies vir die nakoming van beroepsgesondheid en veiligheid deur arbeidsinspekteurs van die ministerie word gereeld gedoen. Volgens Nghimtina is altesaam 973 inspeksies uitgevoer. In 173 gevalle is bevind dat die ondernemings behoorlik aan die bepalings van die wet voldoen; in 320 gevalle was dit gemiddeld en in 500 gevalle was dit swak. Altesaam 2 380 inspeksies is na werksomstandighede gedoen. Hiervan het 1 689 goed aan die vereistes voldoen en 691 nie.Nghimtima het nie gesê oor watter tydperk die inspeksies gedoen is nie.

Regering 'trek nié Chinese voor'

Kommentaar

Republikein 2026-02-04

Meld asseblief aan om kommentaar te lewer

Regering 'trek nié Chinese voor'

Kommentaar

Republikein 2026-02-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.