Reeds 140 seekoeikarkasse verwyder

Francoise Steynberg Altesaam 140 seekoei- en agt buffelkarkasse is reeds van die Kavangorivier verwyder nadat miltsiekte aan die begin van Oktober in die Bwabwata Nasionale Park uitgebreek het. Dit is gister deur die woordvoerder van die ministerie van die omgewing en toerisme, mnr. Romeo Muyunda, bevestig.“Ons het die Namibiese weermag (NDF) se toestemming gekry om hulp te verleen en ons werk nog aan die logistiek daaraan verbonde,” het Muyunda gesê.Hy het gesê die hoofrivierkanaal, wat die hoofrisikogebied vir mense en vee is, is skoongemaak.“Die uitdaging is nou die Mahango-park, waar toeganklikheid 'n kwessie is. Daarom het ons die NDF om hulp genader. Ons is seker sodra die NDF hul dienste beskikbaar gemaak het, ons daartoe in staat sal wees om alle karkasse te verwyder,” het hy gesê.Die minister van die omgewing en toerisme, mnr. Pohamba Shifeta, het verlede week tydens die amptelike opening van die Khaudum Nasionale Park se twee nuwe parkstasies, Khaudum en Sikeretti, in die Kavango-Oosstreek, bevestig geen gevalle van miltsiekte is tot dusver onder mense en vee gekry nie.Shifeta was verlede week op besoek aan die geraakte gebied en het lugwaarnemings uit 'n helikopter van die Namibiese polisie se lugvleuel waargeneem.“Amptenare van die ministeries van die omgewing en toerisme; landbou, water en bosbou; gesondheid en maatskaplike hulpbronne; en visserye en mariene hulpbronne het só hard gewerk. Ons kon daarin slaag om die siekte in bedwang te hou. Die karkasse is verwyder en verbrand,” het die minister gesê. Hy het gesê die mortaliteitsyfer van die seekoeie het ook gedaal. Amptenare wat karkasse verwyder het, het aan Republikein vertel dit was baie harde werk om die karkasse te verwyder. “Dit was 'n aaklige gesig om te aanskou, veral die dooie seekoeikalfies, en die stank wat in die lug hang, is ondraaglik.” Volgens Muyunda het gemeenskappe en inwoners van die Mukwe-kiesafdeling reeds voorkomende behandeling teen miltsiekte ontvang.Dr. Milton Maseke, hoofveeartsbeampte van die direktoraat van veeartsenydienste in die ministerie van landbou, water en bosbou, het gister bevestig die inentingsveldtog van vee in die geraakte gebiede is voltooi.Mnr. Renier Burger, adjunkdirekteur van binnelandse visserye, het gister ook bevestig geen visse in die rivier is tot dusver geaffekteer nie. Intussen is die uitslae van die ministerie van landbou, water en bosbou se watertoetse nog nie bekend nie. Miltsiekte word deur die bakterie Bacillus anthracis veroorsaak en is hoogs aansteeklik vir mense en diere.

Reeds 140 seekoeikarkasse verwyder

Kommentaar

Republikein 2026-02-03

Meld asseblief aan om kommentaar te lewer

Reeds 140 seekoeikarkasse verwyder

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.