Reds se aptyt was groter, sê Swys

Christo Buchner - Die Leeus het Saterdag ’n gegewe perd in die bek gekyk in hul nederlaag van 27-22 teen die Reds in dié twee spanne se Superkragmeting in Brisbane.’n Skokkende vertoning in die eerste helfte, waar hulle in die vlees, maar beslis nie in die gees nie, op die veld was, het die Leeus duur te staan gekom.Met die omdraaislag was hulle reeds met 24-0 agter en het uiteindelik eers in die laaste halfuur wakker geskrik. Maar toe moes hulle van 27-0 terugkom en was die terugvegpoging pure verniet.“Ons het teen ’n span gespeel wat meer uitgehonger vir die oorwinning was,” het Swys de Bruin, die Leeus se hoofafrigter, erken.“Ek is lank genoeg in hierdie spel om sommer al gou te kon sien hierdie ouens se wil is groter,” sê De Bruin. “Hulle was desperaat vir die sege.”In die eerste helfte, waarin die Reds toegelaat is om vier drieë te druk, het dit gelyk asof die Leeus nog iewers op ’n strand in Sydney lê.Die besoekers het duidelik weer in die slaggat getrap om te dink hulle hoef net op te daag om hierdie wedstryd te wen teen ’n penkopspan met elf spelers jonger as 21 jaar oud daarin.Dit is ’n klad op die naam van ’n deurwinterde span soos die Leeus om dié flater te begaan.Franco Mostert, die kaptein, het ruiterlik erken van die spelers het nie gedoen wat van hulle verwag is nie.“Ons het ons ondersteuners by die huis sleg in die steek gelaat en sal volgende week alles doen om hulle weer trots op ons te maak,” het hy gesê.Die Reds het twee drieë vanaf rolmaalbewegings, asook ’n onderskepdrie, gedruk nadat Elton Jantjies ’n wilde aangee gegooi het.Nog een het gevolg met die vleuel Madosh Tambwe wat net ’n bal blindelings laat loop het.Boonop is die Leeus in die lynstane ore aangesit en is verskeie van hul ingooie gesteel.De Bruin sê die Reds se ondersteuners kan baie trots wees op die passie en honger waarmee hul span gespeel het.Hy meen die 22 onbeantwoorde punte wat sy span in die laaste halfuur aangeteken het, was ’n baie goeie terugvegpoging, “maar ons poging vandag was net nie goed genoeg nie. Dit is een van daardie dae waarop ons die teenstander op die skouer moet klop.”Punte:Reds 27 (24): Drieë: JP Smith, Caleb Timu, Brandon Paenga-Amosa, George Smith. Doelskoppe: Filipo Daugunu (2). Strafdoel: Daugunu.Leeus 22 (0): Drieë: Malcolm Marx (2), Marnus Schoeman (2). Doelskop: Elton Jantjies. – Netwerk24

Reds se aptyt was groter, sê Swys

Kommentaar

Republikein 2025-12-19

Meld asseblief aan om kommentaar te lewer

Reds se aptyt was groter, sê Swys

Kommentaar

Republikein 2025-12-19

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.