Rede vir kragonderbrekings nog onbekend
Elvira Hattingh - Vir die tweede keer in minder as ’n maand was die sentrale, sentraal-noordelike en westelike dele van die land Vrydagaand wéér in donker gehul.
Dié kragonderbreking van bykans twee ure lank, het gevolg nadat die Auas/Kokerboom 400 kV-lyn afgeslaan het – een van die hooflyne wat vir elektrisiteit in Sentraal-Namibië verantwoordelik is. Op 28 Junie het ’n kragonderbreking ook oor groot dele van die land voorgekom nadat die Aries/Kokerboom 400 kV-lyn afgeskop het.
NamPower sê dele suid van Mariental asook die Skorpion Zinc-myn is nie deur die onlangse onderbreking geraak nie. So ook het die Zambezistreek, Otjiwarongo, Outjo en omliggende gebiede die onderbreking vrygespring, danksy ’n verbintenis tussen die Zambezi-substasie naby Katima Mulilo en die Gerus-substasie naby Otjiwarongo.
Volgens ’n mediaverklaring wat deur NamPower uitgereik is, is die kragtoevoer in die geraakte dele in fases herstel en het Windhoek teen 22:52 weer kragtoevoer gehad. Die oponthoud het egter gelei tot onder meer die onderbreking van ’n rugbywedstryd op die United-sportgronde.
’n Landwye kragonderbreking het ook in April voorgekom.
Die kragvoorsiener sê egter dit kon nog nie vasstel wat Vrydag se onderbreking veroorsaak het nie en dat dit ondersoek word.
Teen saktyd het NamPower nog nie op Republikein se vrae gereageer waarom die onlangse onderbrekings juis op die Kokerboom-lyn voorgekom het en of al vasgestel kon word wat die vorige kragonderbrekings veroorsaak het nie.
Die minister van myne en energie, mnr. Obeth Kandjoze, het egter by meer as een geleentheid die afgelope jaar die versekering gegee dat Namibië nie deur beurtkrag geraak sal word nie en dat die ligte sal aanbly.
Dié kragonderbreking van bykans twee ure lank, het gevolg nadat die Auas/Kokerboom 400 kV-lyn afgeslaan het – een van die hooflyne wat vir elektrisiteit in Sentraal-Namibië verantwoordelik is. Op 28 Junie het ’n kragonderbreking ook oor groot dele van die land voorgekom nadat die Aries/Kokerboom 400 kV-lyn afgeskop het.
NamPower sê dele suid van Mariental asook die Skorpion Zinc-myn is nie deur die onlangse onderbreking geraak nie. So ook het die Zambezistreek, Otjiwarongo, Outjo en omliggende gebiede die onderbreking vrygespring, danksy ’n verbintenis tussen die Zambezi-substasie naby Katima Mulilo en die Gerus-substasie naby Otjiwarongo.
Volgens ’n mediaverklaring wat deur NamPower uitgereik is, is die kragtoevoer in die geraakte dele in fases herstel en het Windhoek teen 22:52 weer kragtoevoer gehad. Die oponthoud het egter gelei tot onder meer die onderbreking van ’n rugbywedstryd op die United-sportgronde.
’n Landwye kragonderbreking het ook in April voorgekom.
Die kragvoorsiener sê egter dit kon nog nie vasstel wat Vrydag se onderbreking veroorsaak het nie en dat dit ondersoek word.
Teen saktyd het NamPower nog nie op Republikein se vrae gereageer waarom die onlangse onderbrekings juis op die Kokerboom-lyn voorgekom het en of al vasgestel kon word wat die vorige kragonderbrekings veroorsaak het nie.
Die minister van myne en energie, mnr. Obeth Kandjoze, het egter by meer as een geleentheid die afgelope jaar die versekering gegee dat Namibië nie deur beurtkrag geraak sal word nie en dat die ligte sal aanbly.
Kommentaar
Republikein
Geen kommentaar is op hierdie artikel gelaat nie