Reddingsboei van N$40 miljoen vir NWR

Francoise Steynberg – Namibia Wildlife Resorts (NWR) het verlede week 'n reddingsboei van N$40 miljoen van die regering ontvang waarvan 'n gedeelte aan die vrywillige skeidingspakkette van sowat 250 werknemers sal gaan.“'n Deel van die fondse sal vir personeelkoste (ons salarisrekening en vrywillige skeidingspakkette) aangewend word,” het NWR se besturende direkteur, dr. Matthias Ngwangwama, in 'n mediaverklaring gesê.“Die grootste gedeelte van die fondse sal in die Namibiese ekonomie teruggepomp word deur onmiddellik alle agterstallige rekeninge van verskaffers te betaal.”NWR het onlangs 'n keuse aan sy werknemers gegee om vanaf 22 September tot 22 Oktober vrywillige skeidingspakkette te aanvaar.Volgens NWR se korporatiewe kommunikasiehoof, mnr. Mufaro Nesongano, het NWR einde September 846 werknemers in diens gehad.“Die doelwit is dat 250 werknemers vrywillige skeidingspakkette sal aanvaar,” het Nesongano gesê.“Sedert middel Maart toe Covid-19 in Namibië uitgebreek het, het NWR se direksie en bestuur nóú met hul aandeelhouer, die regering deur die ministerie van staatsondernemings (SOE's), saamgewerk om die impak van die pandemie te verminder en volhoubaarheid van die maatskappy te verseker,” lui die verklaring.“Die afgelope ses maande was vir die meeste Namibiese maatskappye die uitdagendste ooit. Die pandemie het steeds 'n reuse-impak op die toerismesektor wêreldwyd.”Volgens NWR was daar sedert Maart talle interaktiewe pogings tussen NWR en sy aandeelhouer en die finansiële hupstoot van N$40 miljoen is op 20 Oktober vanjaar aan die maatskappy beskikbaar gestel wat deel van die halfjaar-hersieningsbegroting vir 2020-'21 uitmaak.“Die laaste keer dat die maatskappy sulke finansiële steun van die aandeelhouer ontvang het, was in 2017 vir 'n bedrag van sowat N$6 miljoen,” lui die verklaring.By NWR se jaarvergadering in Julie is aangekondig dat die maatskappy verlede jaar vir die eerste keer 'n wins van N$22 miljoen sedert sy stigting in 1999 getoon het.TransNamib is die ander staatsinstelling wat 'n reddingsboei van N$35 miljoen uit die halfjaar-hersieningsbegroting vir die 2020-'21-boekjaar ontvang het. Volgens die uitvoerende hoof, mnr. Johny Smith, sal dit vir onderhouds- en ander bedryfskoste aangewend word. – francoise@republikein.com.na

Reddingsboei van N$40 miljoen vir NWR

Kommentaar

Republikein 2025-04-30

Meld asseblief aan om kommentaar te lewer

Reddingsboei van N$40 miljoen vir NWR

Kommentaar

Republikein 2025-04-30

Meld asseblief aan om kommentaar te lewer

MELD AAN

Advertensie