Real Madrid-kliniek was van waarde

Vanjaar se afrigtingskliniek aangebied deur die Real Madrid-stigting (RMF) was ’n groot sukses met bykans 200 spelers en tien afrigters van oral in die land wat by The Dome op Swakopmund vir dié unieke ervaring byeen was.Die kliniek wat deur die topklas afrigters Carlos Gustavo Albert Garcia en Héctor Vicente gelei is, het verlede week met intensiewe oefensessies begin totdat dit Vrydag met ’n toernooi vir die ouderdomsgroepe onder 9, o.11, o.13 en o.15 afgesluit het.Tydens die vyfdaagse kamp is die deelnemende afrigters ook voortdurend opleiding gegee.Sowat driekwart van die kinders kom uit minder bevoorregte gemeenskappe en kon net danksy die vrygewige hulp van borge deelneem.“In terme van sokkervermoë was vanjaar se standaard selfs beter as die vorige jaar,” sê Garcia, wat vir drie jaar vir Real Madrid se eerste span gewerk het. Die 35-jarige was verlede jaar ook by die eerste kliniek betrokke en het dadelik vir Namibië en sy mense lief geraak.Garcia sê hy wou so spoedig moontlik na Namibië terugkeer, want hy sien groot potensiaal in die land.“Namibië het baie talentvolle jongmense. Ons soek nie noodwendig die volgende Cristiano Ronaldo nie, maar ons wil Real Madrid se waardes onder die kinders bevorder en ontwikkel in elke aspek van die lewe,” het die Spanjaard gesê.Vir sy vennoot Vicente was die kliniek ook iets spesiaals: “Dis altyd fantasties om kinders van verskillende sosiale agtergronde te sien speel en om saam pret te hê.”Benewens die sportiewe aspekte het Bank Windhoek as hoofborg aan die einde van elke dag finansiële opvoedkundige programme vir die kinders aangebied.Sanet de Waal, Bank Windhoek se hoof van korporatiewe maatskaplike belegging, borgskappe en geleenthede, sê: “Wêreldwyd sien ons in die sportwêreld dat geld onbehoorlik aangewend word. As ’n verantwoordelike finansiële vennoot vir verskeie sportkodes in die land, het Bank Windhoek die geleentheid gesien om as ’n vennoot met The Dome hierdie sokkerkliniek te bedien moontlik te maak. Dit was ’n kans om jong sokkerspelers te leer hoe belangrik finansiële beplanning is. Die jong spelers kan hierdie vaardighede gebruik, nie net as professionele spelers nie, maar sommige van hulle kan administrateurs by skole van klubs word.“Ons glo dat die basiese finansiële beginsels wat ons oorgedra het, hulle sal met die bestuur van hul private geldsake asook klubbestuur sal help.”Die hoof organiseerder Romona Poulton het onderstreep: “Die kliniek het baie voorbereiding en reëlings geverg om vlot te loop. Ons is baie dankbaar aan al ons borge, aangesien hulle so ’n sleutelrol gespeel het. Ons hoop die kinders het iets geleer wat hulle in die toekoms sal help.”Die kliniek is moontlik gemaak met die steun van Bank Windhoek, Hollard Insurance, Ohorongo Cement, Blue Sea Fishing, Seawork Fish Processors, Hospitality Association of Namibia, Spinnaker Software, SAN Fishing, Federation of Namibia Tourism Association, Tour & Safari Association of Namibia, Journeys Namibia, Marigold Hotels, Queensway Group, Reservations Destination, Café Anton, Sylvia Fritze, Catamaran Charters, News Café Swakopmund, Spur, Food Lovers Market, Checkers Waterfront, Bits & Pizza, Royal Bull, Deutches Haus, BON Hotel, Toulmins, Coca-Cola, OTB Sport, Perreira Fishing, Hotel Zum Kaiser, Atlantic Villa Guest House, Theunis Keulder, Heidi Snyman en Ongava.

Real Madrid-kliniek was van waarde

Kommentaar

Republikein 2025-06-17

Meld asseblief aan om kommentaar te lewer

Real Madrid-kliniek was van waarde

Kommentaar

Republikein 2025-06-17

Meld asseblief aan om kommentaar te lewer

MELD AAN

Advertensie