Reaksie op Covid-19 struikel uit die blokke

Henriette Lamprecht – ’n Namibiër wat saam met die Romeense egpaar wat positief vir Covid-19 getoets het, van Doha na Windhoek met Qatar Airways gereis het, is twee keer by openbare gesondheidgeriewe in Windhoek weggewys toe hy homself vir die siekte wou laat toets het.

Die man het Saterdagoggend via die nasionale uitsaaier se televisiediens gehoor die Romeense egpaar het positief vir die siekte getoets.

Volgens ’n familielid by wie hy tuisgaan, is hulle onmiddellik na die Windhoek Sentrale Hospitaal om hom weens sy reisgeskiedenis vir Covid-19 te laat toets.

Hier is hy glo deur personeel “uitgelag”.

“Hulle het gelag en grappe hieroor gemaak en gesê hy moenie naby hulle staan nie,” vertel die familielid.

Die man is vervolgens deur personeel by die hospitaal aangesê om eerder die Robert Mugabe-kliniek te besoek. Hier is hy ook nie getoets nie en is hy glo weggestuur “met ’n masker” en gesê hy en die familielid moet hulself isoleer.

Volgens die familielid het hulle Sondag die ministerie van gesondheid se noodnommer, 0800 100 100, geskakel om raad te vra en homself “aan te meld”.

“Die persoon het gevra of hy enige simptome van die siekte toon en of hy koors het. Sy temperatuur was en is egter steeds normaal. Die persoon het ook sy sitplek- en kaartjienommer gevra. Ek het verduidelik ons was by die Sentrale Hospitaal en die Robert Mugabe-kliniek, wat ons weggewys het. Die antwoord was dat ons nie getoets sal word alvorens ons enige simptome toon nie,” het die familielid gesê.

Gister het die familielid ’n private dokter gebel en die situasie verduidelik.

Die dokter het ’n Pathcare-vorm aan hom gegee wat saam met nog twee vorms van die staat ingevul moet word en vier bladsye behels.

Die private dokter het die twee vorms egter nie gehad nie.

By Pathcare, sê die familielid, kon hulle nie die praktyk binnegaan nie en moes hulle vanuit hul motor in die parkeerterrein ’n nommer skakel waarná ’n personeellid in beskermende drag die toetse hier uitgevoer het.

Dit behels die neem van ’n skraap in elke neusgat en die keel.

“Terwyl ons hier was, is vyf motors voor ons deur dieselfde toetse. Twee was regeringsvoertuie met lyfwagte wat buite gewag het.”

Volgens die familielid sal die uitslag van die toetse binne 48 uur beskikbaar wees en deur hul dokter aan hulle deurgegee word.

Die familielid sê die Namibiër is Vrydagaand deur verskeie vriende en familie terug in die land verwelkom, wat sodoende moontlik ook aan die siekte blootgestel is.

Elkeen is aangesê om hulself ook te laat toets en te isoleer.

“Een van die mense wat teenwoordig was, het haar dokter gebel. Sy het dit situasie aan die ontvangsdame verduidelik, wat gesê het sy moet haarself isoleer, maar sy moet ook ’n afspraak by die dokter maak. Dit maak mos nie sin nie!”

Volgens die familielid heers daar Babelse verwarring oor die toetse en is daar geen riglyne vir Jan Publiek oor wat hom te doen staan en waarheen om te gaan nie.

“Almal is angstig en wil net gerus gestel word, maar niemand weet wat om te doen nie. Jy wil jouself laat toets, maar jy word nie toegelaat om dit te doen nie!”

Intussen het die minister van gesondheid, dr. Kalumbi Shangula, by navraag bevestig daar word op die uitslae van drie vermoedelike gevalle van die siekte gewag.

Een is van iemand uit Duitsland, die tweede van ’n trokdrywer uit Suid-Afrika en die derde van die persoon wat via Doha met Qatar Airways na Namibië gereis het.

Volgens Shangula is nie een van die mense siek of word in ’n hospitaal behandel nie.

– [email protected]