Radiografis doen MRI-skandering op jagluiperd

Francoise SteynbergIn haar loopbaan van 20 jaar as radiografis het me. Sibylle Hähner al talle medieseresonansiebeelding (MRI)-skanderings op mense gedoen, maar nog nooit op ’n jagluiperd nie.Sy is ’n diereliefhebber en ’n jarelange ondersteuner van die Cheetah Conservation Fund (CCF). Hähner het verlede Vrydag geskiedenis gemaak toe sy die eerste MRI-skandering ooit op ’n jagluiperd gedoen het.Dit volg nadat die 14-jarige Smartman, ’n jagluiperd van die CCF, voortdurend neurologiese probleme getoon het. Die span veeartse van CCF, noord van Otjiwarongo, het besluit om Smartman vir ’n MRI na Windhoek te bring om sy toestand te diagnoseer. “Ons het al X-strale gedoen om die oorsaak te vind en met ons span van nasionale en internasionale veeartse gekonsulteer,” sê dr. Laurie Marker, stigter en uitvoerende direkteur van CCF, in ’n mediaverklaring. “Nadat ons met CCF se wildveearts, dr. Ulf Tubbesing, gekonsulteer het, het ons besluit om Smartman vir ’n MRI Windhoek toe te bring.”Die CCF het vroeg verlede Vrydag met Smartman na die hoofstad gery en eers by die Rhino Park-veeartskliniek gestop, waar Tubbesing en veearts, dr. Minty Soni, hom onder narkose geplaas het. Daarna was dit ’n rit van tien minute na Hähner toe, waar sy en ’n mediese tegnikus dieselfde skandering op die jagluiperd as op mense gedoen het.Die hele proses het sowat 90 minute geduur. Hähner en haar broer mnr. Wilfried Hähner, ’n bekende in radiokringe, het boonop gehelp om Smartman se prosedure te borg. “Die MRI-skandering het sekere algemene oorsake soos gewasse of ’n werwel wat geskuif het, uitgeskakel. Die skandering sal nou met plaaslike veeartsenyspesialiste en ons internasionale span gedeel word om hul mening te kry,” het Marker gesê. “Smartman se toestand word steeds by die CCF-sentrum dopgehou terwyl hy onder 24 uur sorg en toesig van CCF se span is.” Marker sê: “Ons sal nie ophou om te probeer uitvind wat fout is met Smartman nie. Ons wil die beste gehalte lewens moontlik vir al ons diere hê.” Die Hähners se groot lief vir Namibië se natuurskoon en wildlewe is welbekend. Sibylle is ook ’n kranige vryskutfotograaf en voëlkyker. Sy is die een wat agter die rooikuifloerie (Musuphaga rossae) in Desember aangevlieg het om dié pragvoël met haar eie oë langs die Kavangorivier te sien en te kiek. Die rooikuifloerie is toe vir die eerste keer op die oewer van dié rivier by die Taranga Safari Lodge, sowat 35 km wes van Rundu, ontdek. - francoise@republikein.com.na

Radiografis doen MRI-skandering op jagluiperd

Kommentaar

Republikein 2025-09-18

Meld asseblief aan om kommentaar te lewer

Radiografis doen MRI-skandering op jagluiperd

Kommentaar

Republikein 2025-09-18

Meld asseblief aan om kommentaar te lewer

MELD AAN

Advertensie