Raak ontslae van die strydbyle

ANONIEM SKRYF:Vandat die biskopskandidatelys bekend geword het, het beskuldigings links en regs ingekom en later in die hof gaan eindig. Die verkiesing het plaasgevind met beskuldigings, naamskending en allerhande beledigings teen die leierskap en veral teen die voormalige vise-biskop.Ek wil my hoed afhaal vir pastoor Paul Hatani Kisting, wat te midde van hierdie storms wat om hom gewoed het, kalm gebly het. Daar was nie ’n kandidaat wat hom of haarself op die lys geplaas het nie, dit was die werk van die verkiesingskommissie. Kisting het by die sinode sy posisie en hoe hy op die lys beland het breedvoerig verduidelik en ook sy samewerking en ondersteuning belowe aan die volgende leierskap van die ELKRN en ook die inkomende leierskap sterkte toegewens.My probleem is die mense wat hom nog steeds aanval, versleg en aandring dat hy die huis ontruim waarin hy bly. My vraag is: Is dit reg dat sommige lede hom dreig om die huis te ontruim met dreigemente dat iets “unthinkable” sal volg as hy nie die huis ontruim nie? Dit is ’n ernstige dreigement wat nie ligtelik opgeneem kan word nie.Die kerk staan nog onder ’n leierskap. Hierdie leierskap bestuur nog steeds die kerk en neem nog besluite saam met die nuwe leiers. Die huis was ook nooit ’n biskopswoning nie; die voormalige biskop het alreeds uit die woningshuis uitgetrek en ook die ampsvoertuig teruggegee.Kisting is nog op die betaalstaat van die ELKRN en daar is nie ’n manier wat die kerkleierskap hom kan uitskop nie. Sy aftrede is nog ver en die kerk kan nog van sy dienste gebruik maak; sy vrou werk ook nog steeds vir die ELKRN.Dit is daarom verkeerd om deur SMS’e, WhatsApp's en die sosiale media die leraar uit die huis te sit. Dit is nie ons werk nie, dit is die werk van die leierskap en nie enige oproermaker en opsteker nie. Stop dit, asseblief.My raad en versoek is soos volg: Raak ontslae van die strydbyle, stop die aanvalle, beledigings, minagtende en respeklose gedrag, vergeet van die verlede en kom ons strek ons hande uit vir die pad vorentoe. Kom ons vergewe mekaar soos Christene, tel die stukkies op om te bou aan ’n nuwe ELKRN.Vergeet van ’n “Interim Committee”. Gee die leierskap kans om die ELKRN te lei, sonder om te veel in te meng.Dit is ons kerk en ons het die volste reg om ons stemme te laat hoor, maar daar is kanale waardeur ons moet gaan, nie na koerante nie. Die griewe, klagtes ens. moet eers op parogievlak hanteer word, daarna op kringvlak en dan op die hoë tafel van die kerkraad beland as geen oplossings gevind of ooreenkomste bereik kan word nie.As ons nie nou ophou nie, wanneer wil ons ophou en wie sal vir ons kom sê om op te hou met hierdie stryd waarin ons staan? Mag die Here ons terugroep na Sy tafel van versoening terwille van die ELKRN.

Raak ontslae van die strydbyle

Kommentaar

Republikein 2025-11-05

Meld asseblief aan om kommentaar te lewer

Raak ontslae van die strydbyle

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.