Raadop met geraas

ANONIEM SKRYF:So 'n wyle terug het een van ons meer bekende verslaggewers, Tanja Bause, 'n kort rubriek geskryf in verband met die “ Bure van hel”.Hier by my het dit so erg geraak dat een van die bure besluit het om haar huis te verkoop en te trek na ’n stiller woonbuurt, van waar sy laat weet het dis soos hemel op aarde.Daarna het dit effe stil geraak, tot laas Vrydag 26 Maart so om en by 17:00, toe dit weer in alle erns van voor af begin het.Wel, dis nou Sondagoggend 28 Maart en die tyd is 10:20 voormiddag en die geraas en gelag en geskree raak net al hoe erger. Hoe de duiwel kan mens drie dae lank, sonder slaap, met ’n partytjiegeraas aanhou sonder oponthoud en sonder enige respek vir jou bure om jou?En daar begin die lawaai van motorenjins ook wat nou oopketel getoer word, om almal behoorlik de moer in te maak. Ag nee man, dit raak nou te erg.Dit help nie om vir City Police te skakel nie, want daar word gearriveer en daar word gegroet, asof hulle ou vriende is, want hulle werk mos almal vir dieselfde baas, die City of Windhoek.Ek gaan die e-pos ook vir die hoof van onse munisipaliteit aanstuur. Nie dat ek enige hoop op 'n oplossing het nie, maar kom ons vat maar daardie kans ek kyk wat gebeur. Indien dit so ongelooflik klink, kom maak maar self ’n draai en luister hoe dit daar gaan.My huis is so skuins oorkant hulle en ek gaan net na die skrywe vir my ’n piekniekmandjie pak en die bos en berge in vlug om stilte te gaan soek. Ek wil nie die mense direk aanvat nie, want ek weet waarop dit gaan uitloop en ek het geen lus om aangekla te word vir enigiets nie en nog minder om met my agterwêreld in die tronk te gaan sit.Plaas dit gerus weer in die koerant as dit sal help. Enige hulp uit enige oord sal verwelkom word.

Raadop met geraas

Kommentaar

Republikein 2025-09-17

Meld asseblief aan om kommentaar te lewer

Raadop met geraas

Kommentaar

Republikein 2025-09-17

Meld asseblief aan om kommentaar te lewer

MELD AAN

Advertensie