RA tot RCC se redding

Augetto Graig Die Paaieowerheid (RA) sal die sukkelende Paaiekontrakteursmaatskappy (RCC) as staatsonderneming probeer red deur oor elk van die volgende drie jare minstens N$280 miljoen se padbouwerk hieraan toe te ken. Dié aankondiging was deel van mnr. Brian Katjaerua se afskeidstoespraak toe hy Maandag amptelik sy voorsitterskap van die RA-raad neergelê het.Die voormalige raadslid me. Lily Brandt neem die voorsitterskap van die raad oor, met haar mederaadslede mnre. Profysen Muluti, Gerson Kadhikwa, Pieter Greeff en Tuyoleni Hamata, asook mee. Hellen Amupolo en Gloria Tshoopara.“Ná vele vergaderings en konsultasies kon ons suksesvol ’n driejaarooreenkoms met die RCC bereik. Hierdie ooreenkoms maak voorsiening vir padonderhoud en verwante werke ter waarde van minstens N$280 miljoen per jaar, wat aan die RCC toegeken moet word vir die tydperk van die ooreenkoms,” het Katjaerua gesê. “Die hoofdoel van die ooreenkoms is om ’n raamwerk te vestig waarin die Paaieowerheid en die ministerie van werke en vervoer sekere jaarlikse kontrakte sal bekom en aan die RCC sal toeken, om dié onderneming in staat te stel om sy herstelstrategie uit te voer,” het Katjaerua uitgebrei.Sy toespraak het verskeie prestasies van die RA gedurende sy dienstydperk op die raad uitgelig – vanaf 2014 as gewone raadslid en vanaf 2017 as raadsvoorsitter. Katjaerua is trots dat Namibië in 2021 weer vir die vyfde opeenvolgende jaar as die land met die beste paaie in Afrika aangewys is. Hy noem ook dat die owerheid die teiken van 526 km nuwe teerpad, gestel in die eerste Harambee-welvaartsplan (HPP), oortref het deurdat die padnetwerk met 644 km verleng is. “Tydens ons ampstermyn het die organisasie, as deel van die Harambee-plan, begin met Namibië se eerste dubbele snelweë tussen Windhoek en Okahandja, tussen Windhoek en die Internasionale Lughawe Hosea Kutako en tussen Swakopmund en Walvisbaai. Ek is verheug om hier aan te kondig dat bouwerk goed vorder en dat sommige fases van alle projekte voltooi is,” het hy gesê.Nog ’n hoogtepunt is RA se laevolume padseëlprojek, wat die opgradering van min gebruikte grondpaaie behels en bydra om onderhoud van dié paaie te verminder. Dit pas ook in by die RA se strewe om toegang na verafgeleë gemeenskappe in Namibië te verbeter. Hy noem spesifiek die Namalubi-Isize-Luhonono-pad in die Zambezistreek wat vanjaar voltooi sal word. “Dis ’n baie belangrike projek vir die gemeenskappe in daai gebied en sal hul lewens merkwaardig verbeter,” sê hy.Katjaerua het die handhawing van hoë bestuurstandaarde by die RA geprys en noem dat die owerheid se boeke deur onafhanklike ouditeure en die ouditeur-generaal goedgekeur is. Op haar beurt het Brandt gesê: “Ons sal hierdie hoë bestuurstandaarde handhaaf en sorg vir goeie en omsigtige bestuur van die RA se finansiële hulpbronne.”Die nuwe raad sal die uitvoering van die RA se nuutste strategiese vyfjaarplan verseker, sê sy. Padbouprojekte vervat in HPP2 sal uitgevoer word en nuwe grondpaaie gebou word watplattelandse gemeenskappe meer toeganklik maak. Brandt wil ook sien dat diensvlakke by die nasionale verkeersinligtingstelsel NaTIS sodanig verbeter dat kliënte se vlak van tevredenheid bo 80% styg.– augetto@republikein.com.na

RA tot RCC se redding

Kommentaar

Republikein 2026-05-05

Meld asseblief aan om kommentaar te lewer

RA tot RCC se redding

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.