R4 miljoen vir jong vul by perdeveiling gehaal

Nellie Brand-Jonker – ’n Jaar oue merrievul van die teelplaas Klawervlei in Matiland, Kaapstad, is Woensdagaand vir R4 miljoen verkoop by die gesogte veiling vir jaar oud vullens in Kaapstad wat deur Cape Thoroughbred Sales (CTS) aangebied word.Die merrievul van die hings Captain Al en die merrie Pagan Princess, was nommer 129 op die veilinglys van 226.Die vorige rekordprys vir ’n perd was R6 miljoen wat in 2016 gehaal is. Verlede jaar was die topprys ook R4 miljoen.Die veiling het 14:00 begin en sou na verwagting tot 22:00 duur omdat dit vanjaar net een dag lank is.Wéhann Smith, uitvoerende hoof van CTS, sê die 226 perde is effens minder as verlede jaar se 250.Hy ontken dat dit met die ekonomiese toestande verband hou of dat belangstelling in die veiling begin taan.Smith, wat sedert 2017 uitvoerende hoof is, hoop op ’n omset van R100 miljoen, wat effens meer sou wees as verlede jaar s’n.“Enigiets tussen R100 miljoen en R120 miljoen sal ’n goeie resultaat wees.”’n Bekende teler in die bedryf in die Wes-Kaap wat anoniem wou bly omdat die bedryf so klein is, sê daar is goeie perde, maar die gehalte is nie so goed soos vorige jare nie.Markus JoosteHy glo dit is omdat Markus Jooste, voormalige uitvoerende hoof van Steinhoff wat bekend was in renperdkringe vir sy groot besteding en die mag wat hy oor die bedryf uitgeoefen het, uit die mark is.“Hy was ’n groot koper en verkoper. Hy het pryse gelig. Telers gaan waar die geld is. In die ou dae sou hulle hierheen kom.”Jooste se beleggingsvoertuig Mayfair Speculators het ’n groot belang in Cape Thoroughbred Sales gehad.Die vorige rekord wat by die veiling in 2016 gehaal is, was vir die jaar oud vul genaamd Silver Coin wat deur Mayfair Speculators en sy vennoot Coolmore betaal is.Smith ontken dat die korter veiling en minder perde te doene het met die gebeure van verlede jaar toe CTS een van sy groot aandeelhouers verloor het.“Dis deel van die geskiedenis. Ons het verlede jaar al die nodige stappe gedoen om die sakeverhoudinge te verbreek.Mayfair het nie enige aandeelhouding of enige betrokkenheid meer nie. Dis nou ou nuus.”Gaynor Rupert, vrou van Johann Rupert wat Drakenstein-stoetplaas besit, het perde verkoop en gekoop en was teenwoordig.Die gholfspeler Gary Player, wat perde teel, het ook die veiling bygewoon.Ander groot kopers wat te sien was, is Braam van Huyssteen, voormalige eienaar van Tekkie Town, en Bernard Kantor, voormalige besturende direkteur van Investec. – Netwerk24

R4 miljoen vir jong vul by perdeveiling gehaal

Kommentaar

Republikein 2026-02-05

Meld asseblief aan om kommentaar te lewer

R4 miljoen vir jong vul by perdeveiling gehaal

Kommentaar

Republikein 2026-02-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.