Quinn tref goud

Tsumeb is met reg breëbors oor sy Quinn Redding en haar boogskietvernuf.

Tot die burgemeester het haar bedank vir haar prestasies in die sport.

Quinn, wat op 20 November haar 18de verjaardag gevier het, spog met Namibiese kleure in boogskiet en het laas jaar goud by die Junior Afrika-spele ingepalm. Sy het ook laas jaar aa die Jeug Olimpiese Spele deelgeneem.

Haar fokus is nou op kwalifikasie vir die 2024 Olimpiese Spele.

Volgens Quinn is sterk arms 'n móét as jy kampioenboogskutter wil word.

Sy het met die sport begin toe sy maar ses jaar oud was, op aanmoediging van pa en broer.

“Ek oefen elke dag – as ek nie eksamen skryf nie – tuis of by die boogskietbaan.”

Haar gunstelingaspek van die sport is om nuwe mense te ontmoet en die gesondheidsfaktor.

“ 'n Mens moet boogfiks bly,” sê sy.

Dit behels die skiet van 144 pyle per dag. Op kompetisievlak moet die deelnemers 72 pyle skiet.

Op 28 November vanjaar het sy 'n opleidingskamp in Suid-Afrika onder leiding van die boogskietafrigter mnr. Phillipo Clini bygewoon.

Volgende jaar is Quinn in matriek, en daarna wil sy vir 'n jaar lank oefen en fokus op kwalifikasie vir die groot Spele.