PwC ondersoek 3,3 m. dokumente oor Steinhoff
Die forensiese ondersoekers wat Steinhoff aangestel het, het reeds meer as 3,3 miljoen dokumente ingesamel wat ondersoek moet word.
Louis Strydom, ’n vennoot van PwC wat die ondersoek lei, het Woensdagoggend in die parlement voor drie portefeuljekomitees verduidelik wat gedoen is vandat hulle hul aanstellingsbrief op 7 Desember gekry het.
Meer as 100 toestelle is al gekopieer. Dit sluit in skootrekenaars, bedieners, selfone en e-posse.
Die inligting word op ’n spesiale platform gelaai waar dit bekyk word, onder meer deur kunsmatige intelligensie.
Hy sê sewe van PwC se mees ervare vennote op dié gebied in verskillende dele van die wêreld werk daaraan.
Die inligting sluit in 330 000 dokumente wat geskandeer is van uitgedrukte dokumente wat in senior bestuurders se kantore gevind is.
Strydom sê hul opdrag is op 7 Desember gegee. Dit was net twee dae nadat aangekondig is Markus Jooste, voormalige uitvoerende hoof, het met onmiddellike ingang bedank.
Luidens die aanstellingsbrief moes hulle “beweerde onreëlmatighede met boekhouding ondersoek en watter moontlike wetsoortredinge begaan is, asook vraagstukke wat Deloitte (Steinhoff se ouditeure) geopper het”.
Hulle is ook gevra hulle moet enige ander probleem wat onder hul aandag kom, selfs van buite, ondersoek.
Hy sê teen begin Februarie kon hulle aan ’n spesiale komitee van die toesighoudende direksie ’n oorsigdokument verskaf. Die dokument het aangedui hulle gaan in 14 verskillende werkstrome werk.
Die werkstrome is gegrond op die verskillende bewerings.
Hy sê van die werkstrome sal vinniger as ander afgehandel kan word, na gelang van die kompleksiteit. Individuele verslae sal per werkstroom uitgereik word, en daar gaan nie gewag word dat al 14 eers afgehandel word nie.
Hulle staan ook die bestuur by wat versoek het hulle wil weet watter ondernemings geraak word deur die beweerde onreëlmatighede met die boekhouding.
Volgens hom het hulle begin met vier gespesialiseerde hoëvlakhersienings.
Daarvan is ondersoeke oor 39 ondernemings voltooi. Nog 18 is tans aan die gang oor 115 ondernemings.
Op die doenlysie is nog ses hersienings.
“Dit is hersienings wat op hoë vlak uitgevoer word. Ons gaan in en kyk na die sakebedrywighede van die eenhede en kyk of daar van die transaksies is wat ons kan vind met die kennis wat ons nou het. Ons weet (met dié soort ondersoek) verander die kennis en inligting soos ons vorder.
“Ons weet nou al of van die eenhede geraak is of nie. Dié wat nie geraak is nie, kan hul finansiële inligting voorberei en dit sal hul ouditeure help om die oudits klaar te maak.”
Dié wat betrek word, word by die 14 werkstrome ingesluit.
Strydom sê dit is ’n geweldig ingewikkelde maatskappy van meer as 700 individuele ondernemings in 30 jurisdiksies waar “ingewikkelde boekhoukundige onreëlmatighede oor ’n tydperk plaasgevind het’’.
Steinhoff het gesê sy finansiële state van 2015, 2016 en 2017 moet heropgestel word.
“Dit is kompleks, dit is nie maklik nie. Ons werk met ’n span van mense in 17 lande.”
60 mense wat spesialiste is in velde soos tegniese boekhouding, regsake en inligtingstegnologie werk hieraan.
PwC se opdrag is “onbeperk” en niemand meng in met wat ondersoek moet of mag word nie. Hy meen dit is positief. “Ons kan nie ons werk behoorlik doen as ons ’n beperking daarop het nie.”
Hy sê hulle tel elke dag nuwe inligting op.
Volgens hom word maandeliks per werkstroom terugrapporteer aan die direksie en weekliks aan die ouditkomitee.
Hulle skakel ook gereeld met Deloitte oor wat die ouditeure opgetel het en die beweringe waarna hulle wil hê PwC moet kyk. – Netwerk24
Meer as 100 toestelle is al gekopieer. Dit sluit in skootrekenaars, bedieners, selfone en e-posse.
Die inligting word op ’n spesiale platform gelaai waar dit bekyk word, onder meer deur kunsmatige intelligensie.
Hy sê sewe van PwC se mees ervare vennote op dié gebied in verskillende dele van die wêreld werk daaraan.
Die inligting sluit in 330 000 dokumente wat geskandeer is van uitgedrukte dokumente wat in senior bestuurders se kantore gevind is.
Strydom sê hul opdrag is op 7 Desember gegee. Dit was net twee dae nadat aangekondig is Markus Jooste, voormalige uitvoerende hoof, het met onmiddellike ingang bedank.
Luidens die aanstellingsbrief moes hulle “beweerde onreëlmatighede met boekhouding ondersoek en watter moontlike wetsoortredinge begaan is, asook vraagstukke wat Deloitte (Steinhoff se ouditeure) geopper het”.
Hulle is ook gevra hulle moet enige ander probleem wat onder hul aandag kom, selfs van buite, ondersoek.
Hy sê teen begin Februarie kon hulle aan ’n spesiale komitee van die toesighoudende direksie ’n oorsigdokument verskaf. Die dokument het aangedui hulle gaan in 14 verskillende werkstrome werk.
Die werkstrome is gegrond op die verskillende bewerings.
Hy sê van die werkstrome sal vinniger as ander afgehandel kan word, na gelang van die kompleksiteit. Individuele verslae sal per werkstroom uitgereik word, en daar gaan nie gewag word dat al 14 eers afgehandel word nie.
Hulle staan ook die bestuur by wat versoek het hulle wil weet watter ondernemings geraak word deur die beweerde onreëlmatighede met die boekhouding.
Volgens hom het hulle begin met vier gespesialiseerde hoëvlakhersienings.
Daarvan is ondersoeke oor 39 ondernemings voltooi. Nog 18 is tans aan die gang oor 115 ondernemings.
Op die doenlysie is nog ses hersienings.
“Dit is hersienings wat op hoë vlak uitgevoer word. Ons gaan in en kyk na die sakebedrywighede van die eenhede en kyk of daar van die transaksies is wat ons kan vind met die kennis wat ons nou het. Ons weet (met dié soort ondersoek) verander die kennis en inligting soos ons vorder.
“Ons weet nou al of van die eenhede geraak is of nie. Dié wat nie geraak is nie, kan hul finansiële inligting voorberei en dit sal hul ouditeure help om die oudits klaar te maak.”
Dié wat betrek word, word by die 14 werkstrome ingesluit.
Strydom sê dit is ’n geweldig ingewikkelde maatskappy van meer as 700 individuele ondernemings in 30 jurisdiksies waar “ingewikkelde boekhoukundige onreëlmatighede oor ’n tydperk plaasgevind het’’.
Steinhoff het gesê sy finansiële state van 2015, 2016 en 2017 moet heropgestel word.
“Dit is kompleks, dit is nie maklik nie. Ons werk met ’n span van mense in 17 lande.”
60 mense wat spesialiste is in velde soos tegniese boekhouding, regsake en inligtingstegnologie werk hieraan.
PwC se opdrag is “onbeperk” en niemand meng in met wat ondersoek moet of mag word nie. Hy meen dit is positief. “Ons kan nie ons werk behoorlik doen as ons ’n beperking daarop het nie.”
Hy sê hulle tel elke dag nuwe inligting op.
Volgens hom word maandeliks per werkstroom terugrapporteer aan die direksie en weekliks aan die ouditkomitee.
Hulle skakel ook gereeld met Deloitte oor wat die ouditeure opgetel het en die beweringe waarna hulle wil hê PwC moet kyk. – Netwerk24
Kommentaar
Republikein
Geen kommentaar is op hierdie artikel gelaat nie