Publiek trek neus op vir MTC-aandele

Jo-Maré Duddy – MTC maak vanoggend sy debuut op die Namibiese aandelebeurs (NSX), maar aansienlik minder gewone Namibiërs as verwag het reeds ‘n stukkie van dié telekomsreus gekoop - ondanks meer as N$15 miljoen wat in die landswye bemarking van die notering bestee is.Die staatsbeheerde Mobile Telecommunications Ltd het 367,5 miljoen gewone aandele in sy aanvanklike openbare aanbod (IPO) aangebied wat op 20 September geopen het. Toe die IPO op 1 November sluit, het die publiek egter vir net meer as 299 miljoen aandele aansoek gedoen. Die uitslag van die IPO is Woensdag op die NSX en JSE bekend gemaak.Die regering het gehoop om sowat N$3,124 miljard in te samel deur 49% van MTC aan die publiek beskikbaar te stel. Instede het die publiek – meestal institusionele beleggers – net in 39,9% van dié SOE belang gestel. Bykans N$2,542 miljard is met die IPO ingesamel, sowat N$581,9 miljoen minder as die regering se teiken.Institusionele beleggers soos pensioenfondse, wat deur die wet verplig word om ‘n gedeelte van die bates onder hul bestuur plaaslik te belê, het hul vooraf-onderneming gestand gedoen en vir sowat N$2,045 miljard se aandele in totaal aansoek gedoen.Die IPO het ook ongeveer N$719 miljoen se aandele aan individue beskikbaar gestel. Hoewel aandele net N$8,50 stuk gekos het, moes individue vir minstens 200 aandele aansoek doen, ‘n belegging van N$1 700. Daarna was aandele in veelvoude van 100 beskikbaar.Die uitslag van die IPO toon Namibiërs het vir aandele ter waarde van net N$137,2 miljoen in totaal aansoek gedoen. Vergeleke daarmee het gewone Namibiërs sowat twee jaar gelede vir aandele ter waarde van ongeveer N$244 miljoen in totaal in Standard Bank Namibia Holdings se IPO gedoen. SNB Holdings se IPO-aandele was teen N$8,90 stuk beskikbaar.SPIEëLBEELD VAN EKONOMIEMnr. Jaco Schoombie, ‘n ontleder van Cirrus Capital, het gister gesê MTC se IPO-uitslag weerspieël Namibië se ekonomiese resessie en die verbruiker se penarie. Dit toon ook mense se mening dat daar beter aandele en bateklasse as MTC is, sê Schoombie.Met die opening van MTC se IPO het ontleders soos Cirrus gewaarsku dat dié maatskappy gaan kleitrap om te groei en sy verdienste in die toekoms te verhoog. Dít kon voornemende beleggers twee keer laat dink het.Buiten vir Letshego Holdings (Namibia), was al die groot IPO’s vir die plaaslike indeks van die NSX in die onlangse geskiedenis – Bank Windhoek (nou Capricorn Group), FNB Namibia (nou FirstRand Namibia) and SBN Holdings - beduidend oorvolgeskryf. Dit beteken die publiek wou méér aandele hê as wat in die IPO beskikbaar was.Schoombie sê Namibië se regulatoriese omgewing het ‘n groot rol in die relatiewe sukses van MTC se IPO gespeel. Regulasie 28 van die Pensioenfondswet bepaal dat instellings minstens 45% van die bates onder hul bestuur in die land moet belê.“Dié regulasie het beslis met dié IPO gehelp. In die lang termyn wil ‘n mens egter nie instellings forseer om in enige ekonomie of bateklas te belê nie. ‘n Mens wil hê hulle moet aan die beste ekonomie blootgestel word sodat hulle kan groei. Namibië sukkel uiteraard, so dis ‘n bietjie van ‘n probleem,” sê hy.STAATSKAS Toe die minister van finansies, mnr. Iipumbu Shiimi, die notering van MTC aangekondig het, het hy gesê die helfte van die geld wat ingesamel word, gaan help om Namibië se begrotingstekort te finansier. Die regering het toe N$3 miljard verwag, met sowat N$1,5 miljard wat vir die beraamde begrotingstekort van ongeveer N$16 miljard vir 2021-’22 bestem was.Die res is vir “produktiewe aktiewe” bestem en sal só gebruik word dat die langtermynvoordele vir die land inhou, luidens Shiimi se begrotingsdokumente.Schoombie vermoed dit is vir die Soewereine Welvaartsfonds bedoel wat die regering van plan is om vanjaar te stig om Namibië teen toekomstige ekonomiese skokke te buffer.“Noudat daar té min geld is, gaan dié fonds weer agter in die ry inval,” sê hy.FOTODie regering het 49% van MTC aan die publiek beskikbaar gestel, maar hulle het net in 39,9% van dié SOE belanggestel. Foto Nampa

Publiek trek neus op vir MTC-aandele

Kommentaar

Republikein 2026-06-19

Meld asseblief aan om kommentaar te lewer

Publiek trek neus op vir MTC-aandele

Kommentaar

Republikein 2026-06-19

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.