Psemas bloei

Henriette Lamprecht Meer as N$20 miljoen is oor 'n tydperk van twee jaar geëis vir tot 75 pasiënte wat daagliks dokters geraadpleeg het. Sommige pasiënte het tot vier inspuitings per besoek ontvang. Konsultasiefooie is gehef vir elke keer wat 'n pasiënt chroniese medisyne moet gaan afhaal.Dít is van die inligting wat uit 'n vertroulike verslag kom wat op die onreëlmatige uitbetaling van eise aan die staat se mediese fonds (Psemas) fokus. Dié verslag is in April 2010 ná 'n forensiese ondersoek deur Savvy Solutions uitgereik. Volgens die verslag het bedrog die skema tóé reeds N$120 miljoen per jaar uit die sak gejaag. Psemas het 'n verdere N$150 miljoen aan bykomende voordele bestee - iets wat nie noodwendig met die kwaliteit van sorg vir Psemas-lede verband hou nie.Die bykomende uitgawes behels “lekkasies” binne Psemas-strukture en sluit verkeerde diagnoses, gereelde konsultasies, siekebriewe en die gebruik van duur medisyne in.“Dié praktyke spruit gewoonlik uit vermorsing en het 'n minimale impak op die kliniese uitkoms van pasiënte.”Volgens die verslag bestaan geleenthede binne die skema se strukture om bedrog te pleeg “en daarmee weg te kom”.Daar bestaan 'n soort gesindheid dat aanspraak gemaak kan word op eise, want “almal doen dit sonder gevolge”, en lede en diensverskaffers glo hulle is “onderbetaal en 'n mediese fonds is aanvullende vergoeding”.Uit 'n totaal van 40 diensverskaffers wat vir beweerde onreëlmatighede by die betaling van eise ondersoek is, het net minder as die helfte verdere ondersoek en oudits vereis.'n Verdere 10 gevalle is op versoek van die ministerie van finansies en Methealth ondersoek. Uit dié ingrypings is meer as N$2 miljoen aan die skema terugbetaal, terwyl 'n verdere N$3 miljoen se skikkingsooreenkomste gefinaliseer moes word. Die verslag het erken tekortkominge in die skema bestaan reeds sedert Psemas se ontstaan. Die skema is oorspronklik daargestel vir 'n klein groepie staatsdienswerkers in die destydse Suidwes-Afrika Administrasie. Sedert onafhanklikwording het die skema se ledetal geweldig toegeneem, asook die uitbetalings van eise. Psemas het nie tred gehou met dié veranderinge nie.Van die gevalle sluit die volgende in: • In die afwesigheid van 'n dokter is behandelingskodes en eise vir medikasie ingedien wat slegs deur dokters voorgeskryf mag word. • Die hoogste bedrag uitbetalings is geëis en beloop N$20 miljoen vir die tydperk Januarie 2008 tot Desember 2009. Die gemiddelde aantal pasiënte is 74 per dag, met dispensering wat op 75% bo die nasionale gemiddeld van 54% is. • Dispensering van medisyne is 84% teenoor 'n nasionale gemiddeld van 54%. 'n Hoë persentasie chroniese pasiënte is gesien en konsultasiefooie is vir elke besoek gevra, ongeag of die pasiënt bloot medisyne kom afhaal. Daar was 'n tekort van N$3 miljoen tussen die bedrag wat van Psemas geëis is en aankope wat deur die dokter gedoen is. Ekstra konsultasiefooie is gevra waar meer as vyf items per voorskrif gedispenseer is, selfs al is die dokter net een keer besoek. Die beraamde finansiële verlies vir Psemas is N$3 miljoen. • Voorskrifte vir medisyne is sonder volledige inligting ingedien en in sommige gevalle is inligting op voorskrifte verander en was dit strydig met die oorspronklike dokument. Die meeste van die eise was datumloos, terwyl 'n groot aantal sonder enige voorskrifte ingedien is. • Eise is vir X-strale ingedien, terwyl die praktyk nie die nodige toerusting hiervoor het nie. • 'n Hoë aantal eise is vir urientoetse ingedien, met lede wat by navraag erken het hulle het nie so baie toetse laat doen nie. Vals eise is ingedien vir medikasie wat nie ontvang is nie. • Die hoë aantal inspuitings het agterdog gewek, met voorkeur wat volgens die praktisyn aan inspuitings eerder as medisyne gegee word. Onderhoude met geraakte lede het onthul hulle het nié tot vier inspuitings per besoek ontvang nie. • Baie hoë tariewe is geëis vir vervoer tussen plaaslike hospitale, met afstande wat oor minder as 10 km strek. Een rit tussen 'n private hospitaal in Windhoek en 'n dialisesentrum kos 'n minimum van N$713,20 voordat enige prosedures ingesluit is. 'n Maksimum van sowat N$1 500 is per dag vir 'n heen-en-weer rit geëis. Tariewe het ook gestyg ten spyte van die hoeveelheid tyd wat aan die pasiënt bestee is.

Psemas bloei

Kommentaar

Republikein 2025-06-18

Meld asseblief aan om kommentaar te lewer

Psemas bloei

Kommentaar

Republikein 2025-06-18

Meld asseblief aan om kommentaar te lewer

MELD AAN

Advertensie