Protes teen donkieslagpale

Catherine Sasman - Minstens 718 plaaslike inwoners en buitelanders van Suid-Afrika, Tanzanië, Europese lande, die Verenigde Koninkryk, Suid-Korea, Amerika, Kanada, Nieu-Seeland, Australië, die Dominikaanse Republiek, Israel, Afghanistan, Thailand, Irak, Brasilië en Peru het 'n aanlyn versoekskrif onderteken in protes teen die voorgestelde donkieslagpale op Okahandja. Die meerderheid ondertekenaars is Namibiërs.Hoewel die dorp se burgemeester, mnr. Johannes Hindjou, die inisiatief deur die Chinese maatskappy Agri-nature Investment Trade verwelkom, meen die ondertekenaars die munisipaliteit moet die projek heroorweeg.“Hulle (die Chinese) neem ons mooi land en ons dorp oor. Ons moet hulle verhoed om ons wild en ons dorp te ruïneer,” het 'n inwoner en ondertekenaar van die versoekskrif, mnr. Muller Theron, gesê.Die ondertekenaars soek bewyse dat die munisipaliteit 'n advertensie vir die verkoop van erf 780 in Wesstraat geplaas het. Dit is waar Agri-nature Investment Trade beplan om die slagpale op te rig.Die ondertekenaars sê daar is nooit 'n advertensie geplaas dat die betrokke erf aan 'n ander Chinese entiteit, Everlasting Iron Sheet Investment, verkoop is nie. Eintlik is die erf aan die Chinese sakevrou Stina Wu se maatskappy, First Wall Property, verkoop. Wu het vroeër gesê sy verhuur die gebou aan Agri-nature Investment Trade, maar het beklemtoon sy het niks te doen met die voorgestelde donkieslagpale nie.Die ondertekenaars van die versoekskrif wil voorts bewyse sien van die goedkeuring van 'n abattoir-aansoek wat deur die direktoraat van veeartsenydienste in die ministerie van landbou, water en bosbou uitgereik is, as bewys van handelsbetrekkinge tussen China en Namibië in enige wildprodukte.Hulle beweer dr. Jesse Kamwi van die direktoraat het bevestig daar is geen aansoek vir slagpale by sy kantoor nie.Die ondertekenaars wil weet of 'n omgewingsimpakstudie gedoen is en eis om die uitslae daarvan te sien. Hulle wil ook weet of Namibiërs by die slagpale aangestel gaan word, en of die Chinese maatskappy sal hou by Namibië se arbeidswette.Bowenal is die ondertekenaars bekommerd oor die hoeveelheid water wat 'n slagpale van hierdie aard gaan benodig. Hulle beweer dit neem ongeveer 2 500 l water om een donkie te slag. Dit sou 30 000 l water per dag beteken as die Chinese 120 donkies per dag slag.Hulle wil ook weet hoe die beoogde projek ontslae gaan raak van gebruikte water en ander afvalmateriaal, en het hul kommer uitgespreek oor die moontlike besoedeling van ondergrondse waterbronne.“Waar gaan die donkies vandaan kom?” wil hulle weet. “Geen vleisproduk, lewend of dood, mag weens gesondheidsredes Namibië se grense oorsteek nie. Die meeste donkies is in die streke en mag nie lewend verby sekere punte vervoer word nie. Kan jy jouself voorstel plase moet gesluit word weens 'n siekte wat deur donkies oorgedra is? Dit sal chaos, hongersnood en werkloosheid veroorsaak.”Tanja Bause berig dat die Outjo-munisipaliteit Maandag op 'n raadsvergadering die aansoek van Fu Hai Trading Enterprises CC om donkieslagpale op dié dorp oop te maak, sou bespreek. Dit het nie gebeur nie.“Ons het nie oor die slagpale gepraat nie en sal dit by 'n spesiale raadsvergadering op 'n latere datum bespreek. Ons het egter nog nie op 'n datum besluit nie,” het die hoof uitvoerende beampte van die Outjo-munisipaliteit, mnr. Joseph Urib, gesê.Daar is om en by 2 000 handtekeninge in 'n versoekskrif teen die oopmaak van die slagpale wat deur die Outjo Community Committee (OCC) by die munisipaliteit ingedien is. Die raad het in Februarie 'n stuk grond aan die maatskappy toegeken.“Ons het die grond toegeken, maar ons wag nog op goedkeuring van die regering, veeartsenydienste en 'n omgewingsimpakstudie wat hulle aan ons moet verskaf. Ons wag ook nog op 'n volledige sakeplan,” het Urib in Februarie gesê. Intussen het Fu Hai Trading Enterprises 'n sakeplan ingedien wat meer vrae as antwoorde laat, onder meer oor afvalbestuur nadat die diere geslag is. Dié kwessie word nie in die sakeplan aangeroer nie. Die besigheid het ook nog geen aansoek vir die uitvoer van die donkievleis, velle of ander produkte ingedien nie.

Protes teen donkieslagpale

Kommentaar

Republikein 2025-08-05

Meld asseblief aan om kommentaar te lewer

Protes teen donkieslagpale

Kommentaar

Republikein 2025-08-05

Meld asseblief aan om kommentaar te lewer

MELD AAN

Advertensie