Proteas kry nuwe keurderbaas

Johann de Jager – Victor Mpitsang is die Proteas se tiende sameroeper sedert Suid-Afrika se hertoelating tot internasionale krieket in 1991.
Krieket Suid-Afrika het Woensdag aangekondig dat die voormalige Suid-Afrikaanse snelbouler van die Vrystaat die leisels by Linda Zondi oorneem.
Die 40-jarige Mpitsang sal die media Donderdag op die bekendstellingsgeleentheid van die seisoen by Hammanskraal te woord staan.
Mpitsang, voormalige keurderbaas van die Suid-Afrikaanse o.19-span, is laat verlede jaar gevra om die pos van Protea-keurderbaas tydelik oor te neem toe Graeme Smith as direkteur van krieket aan boord gekom het. Hy het dit toe van die hand gewys en gesê die aanbod was net ’n bietjie te vinnig op hom.
Zondi het die afgelope seisoen waargeneem as keurderbaas nadat hy van 2015 tot verlede jaar die laaste heeltydse hoofkeurder was.
Patrick Moroney, ’n ervare krieketadministrateur van Gauteng, en die voormalige keurder Hussein Manack was ander kandidate op die kortlys.
Mpitsang, sowel as Manack, het ná hul speeldae as krieketkommentators by die spel betrokke gebly.
– Netwerk24