‘Profeet’ maak twee kerkhelpers glo swanger

Kenya Kambowe op Satotwa – ’n Selfverklaarde profeet van Rundu het verlede week Dinsdag voor die hoofman van die Mbunza Tradisionele Owerheid, mnr. Alfons Kaundu, verskyn nadat hy na bewering twee vroue wat as sitplekaanwysers in sy kerk werk, swanger gemaak het. Die twee vroue, wat niggies is, het die tradisionele owerheid genader nadat hulle voortdurend komplikasies met hul swangerskappe ervaar het, met die vermoede dat die profeet geestelik “by hulle spook”. Die komplikasies sluit opgeblasenheid en hardlywigheid in, het hulle aan hoofman Kaundu gesê.Mnr. Sebardius Muronga, wat onder sy volgelinge as “Papa” bekend staan, word nou deur die tradisionele owerheid ondersoek terwyl die Namibiese polisie betrek is oor vaderskapkwessies, aangesien hy glo ontken dat hy die pa van die ongebore babas is. Die twee vroue, mee. Anna Sitoka Karufere (34) en Maria Nankali Kandjimi (33), het verlede week aan ons susterkoerant Namibian Sun vertel oor hoe hulle na bewering gebreinspoel en later swanger gemaak is. Karufere is ses maande swanger terwyl Kandjimi se baba volgende maand gebore word. Die Grace Church of All Nations is in Februarie 2021 in Rundu se Satotwa-woonbuurt gestig. Luidens berigte het die tradisionele owerheid intussen opdrag gegee dat dié kerk summier gesluit word.Karufere het van haar beproewing vertel en skokkende besonderhede gedeel oor hoe die pastoor, wat jonger as albei van hulle is, daarin geslaag het om hulle glo te oorreed om na sy pype te dans. Hulle moes glo onder meer verseker die profeet eet warm maaltye en dat sy klere gestryk word. Karufere het vertel daar was vyf kerkhelpers van wie twee in dieselfde kamer as die profeet by ’n huis in Sauymwa moes slaap. “Die profeet het op die bed geslaap terwyl ons twee op die matras by sy voete moes slaap,” het sy vertel. “Ek onthou een aand terwyl ek half aan die slaap was, het hy ons na sy bed toe geroep om weerskante van hom te slaap. Hy het toe die ander helper gevat en saam met haar op die matras gaan slaap, waar hulle seks gehad het. Hy het toe klaargemaak en wou dieselfde met my doen en ek het geweier. “In terme van hoe ek swanger geraak het, sou jy nie weet hoe hy dit doen nie, maar wanneer jy wakker word, sou jy besef jy is nat omdat hy seks met jou gehad het. Ons sal daarvan droom dat hy seks met ons wil hê,” het sy gesê. HUISREëLS Karufere vertel toe hulle by die profeet ingetrek het, is hulle aangesê om hul verhoudings met ander mans te beëindig. “Ons het met mense uitgegaan toe ons by die kerk aangesluit het, maar die profeet het vir ons gesê ons sal eers na die jaar 2024 toegelaat word om weer met mense uit te gaan en werk te kry,” het sy gesê. “Ons is nie toegelaat om oproepe van ons gesinne te ontvang nie, want ons was blykbaar besig om demone by ons lewens in te nooi. Hy het ons selfs beveel om nuwe simkaarte te kry sodat hy die enigste een sal wees wat ons kan kontak. “As ons oproepe van ander mense ontvang het, sou hy kwaad word, ons op ons rûe en boude slaan en sê dis die gees van God wat vir hom sê om ons te dissiplineer.” Die medestigter van die kerk, me. Kornelia Kandonga (39), wat ook oor haar ervaring gepraat het, het gesê sy het die kerk verlaat weens die man van God se gedrag. Kandonga het gesê die profeet het belowe dat sy teen 14 Februarie ‘n profeet sou word, maar sy moes eers vyf keer swanger raak. “Hy het my een dag gebel en vir my gesê ek sal vyf keer swanger moet raak en hulle moet opoffer om ‘n sterk profeet te word. Ek het geweier en vir hom gesê as bloed betrokke moet wees, kan dit net die werk van die duiwel wees en ek wil nie ’n aandeel daarin hê nie,” het Kandonga gesê. G’N KOMMENTAAR Toe Namibian Sun Muronga verlede week Donderdag by sy huis besoek het, het hy geweier om kommentaar te lewer. “Die saak is nog aan die gang en ek is nie in die posisie om met jou te praat nie,” het die profeet kalm opgemerk. Volgens die vroue het die polisie hulle ingelig dat Muronga opdrag gekry het om na die swanger vroue om te sien en te sorg dat niks met hul swangerskappe gebeur nie, anders sal hy aanspreeklik gehou en dalk vervolg word. By die verhoor voor die tradisionele owerheid het die vroue gesê Muronga het erken dat hy met hulle geslaap het, maar ontken dat hy die pa van hul ongebore kinders is. Kaundu het by navraag gesê die saak is aan die polisie oorgelaat. Hulle wag vir die babas om gebore te word om DNS-toetse te doen. – republikein@republikein.com.naFOTODie selfverklaarde profeet, mnr. Sebardius Muronga. Foto FacebookDie tradisionele owerheid het glo intussen opdrag gegee dat die Grace Church of All Nations gesluit word. Foto Kenya Kambowe

‘Profeet’ maak twee kerkhelpers glo swanger

Kommentaar

Republikein 2026-08-12

Meld asseblief aan om kommentaar te lewer

‘Profeet’ maak twee kerkhelpers glo swanger

Kommentaar

Republikein 2026-08-12

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.