'Profeet' Babi se borgaansoek vandag

Francoise Steynberg – Die bekende, charismatiese en selferkende profeet van die House of Joy Ministries, pastoor Jackson Babi (30), en sy medebeskuldigde, mnr. Friza Dumeni, moes die naweek agter tralies bly. Hul saak in verband met die onwettige besit van twee renosterhorings en 'n vuurwapen en ammunisie sonder 'n lisensie is Vrydag in die Windhoek-landdroshof tot vandag vir hul borgtogaansoek uitgestel. Hul regsverteenwoordiger, mnr. Kadhila Amoomo, het alles in sy vermoë gedoen om landdros Jo-Rina Jagger te oortuig om die beskuldigdes se formele borgtogaansoek so spoedig as moontlik te skeduleer, al is daar 'n agterstand in hofsake weens die Covid-19-pandemie. Staatsaanklaer Rowan van Wyk het gesê hy gaan vandag borgtog hewig teenstaan. Buite die hof het die pastoor se aanhangers gestaan wat weens die Covid-19-regulasies nie in die hofsaal toegelaat is nie en deur die venster na hul geliefde "profeet" se eerste hofverskyning moes kyk. Sommige vroue het gehuil. "Al word hy in die hof skuldig bevind, net God kan hom skuldig bevind en veroordeel," het 'n vroulike gemeentelid aan Republikein gesê. Babi was netjies geklee in 'n grys pak, swart hemp en duur swart skoene, maar het agter sy masker vir die media se kameras weggekruip. Dumeni het slonsig langs hom voorgekom in 'n swart sweetpakbroek, maroen sweetpaktop en plakkies met sokkies. Babi en Dumeni is Woensdag in hegtenis geneem nadat die horings van 'n swartrenoster, 'n ongelisensieerde jaggeweer en ammunisie glo in die pastoor se huis in Kleine Kuppe in Windhoek gevind is. Hulle is deel van agt verdagtes wat verlede week in hegtenis geneem is in verband met renosterstropery, horingsmokkelary en die oortreding van die wet op vuurwapens. Twee van die agt is glo onderskeidelik 'n polisiebeampte verbonde aan die eenheid vir die beskerming van baie belangrike persone (BBP) in Windhoek en 'n voormalige lid van die Namibiese weermag (NDF). Die saak spruit uit twee swartrenosterkarkasse wat Dinsdag op 'n plaas in die Gobabis-distrik in die Omahekestreek deur twee plaaswerkers ontdek is. Dinsdag is vier verdagtes op Otjiwarongo in hegtenis geneem nadat hulle glo probeer het om twee horings aan 'n geheime polisiebeampte te verkoop. Dié vier beskuldigdes het Donderdag in die streekhof op Otjiwarongo in camera verskyn en hul name mag nie gepubliseer word nie. Die saak is in 'n baie vroeë en sensitiewe stadium en nóg inhegtenisnemings kan volg, het die woordvoerder van die ministerie van die omgewing, bosbou en toerisme, mnr. Romeo Muyunda gesê. Twee ander verdagtes sou ook Vrydag in die landdroshof op Gobabis verskyn het, maar volgens die hoof van die Blue Rhino-taakspan, komm. Barry de Klerk, het hulle nie verskyn nie. Op die Facebook-blad van House of Joy Ministries word Babi as Daniël in die leeukuil beskryf. "Bly bid vir ons vader en die kerk in hierdie tyd van beproewing. Weerhou julself daarvan om na onbevestigde bronne te luister. Shalom," was die inskrywing Vrydag ná die pastoor se hofverskyning. - francoise@republikein.com.na

'Profeet' Babi se borgaansoek vandag

Kommentaar

Republikein 2026-05-12

Meld asseblief aan om kommentaar te lewer

'Profeet' Babi se borgaansoek vandag

Kommentaar

Republikein 2026-05-12

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.