Privaatskolenaweek 2014 - 'n Byeenkoms uit die boonste rakke
Duisende voetspore in die stof waar die sweet getap het en die breine in hoë versnelling gewerk het tydens die afgelope Privaatskolenaweek op Outjo, is al wat nou op hierdie groot gebeurtenis dui.
Ongeveer 7 500 ouers, onderwysers, leerlinge en afrigters het vanaf 4 tot 8 Junie op Outjo saamgedrom vir die jaarlikse Namibiese Afrikaanse Vereniging van Christelike Onderwys (NAVCO) se Privaatskolenaweek wat vanjaar deur die Privaatskool Moria aangebied is.
Leerlinge van privaatskole van oral in die land kon tydens die geleentheid kragte op die sportveld, kultuurgebied of selfs op die skaakbord meet.
Die aktiwiteite het die Woensdag met tennis, jukskei, skaak, en kulturele aktiwiteite begin.
Een van die hoogtepunte was die hoër- en laerskoolredenaars wat meegeding het. ’n Nuwe toevoeging tot die program, Spervuur, was ’n treffer. Hiervoor het skole in spanne meegeding en hul standpunte verdedig. Spervuur sal moontlik weer in komende jare aangebied word.
Die amptelike opening het die Donderdagaand plaasgevind met ’n massadeelname deur al Moria se leerlinge. Die naweek se tema was “Toeka tot Nou” en die vier pilare van onderwys by die skool, naamlik Godsdiens, akademie, sport en kultuur, is treffend deur groepsdanse uitgebeeld.
Donderdag, Vrydag en Saterdag het altesame 2 000 leerlinge van graad 1 tot graad 12 aan rugby, netbal en hokkie deelgeneem. Volgens woordvoerders van Moria was die sport van hoogstaande gehalte.
Vrydagaand het 1 200 mense heerlik saamgekuier en gedans tydens die steakbraai wat by Sophienhof Lodge gehou is. Die gelukstrekking waarin ’n Toyota-bakkie op die spel was, het ook tydens die geleentheid voor die oë van 1 200 opgewonde en afwagtende toeskouers plaasgevind. Me. E. Delport was die wenner van dié spogvoertuig. Michael Oosthuizen is N$20 000 ryker ná die gelukstrekking, terwyl Arno en Carina Human N$5 000 gewen het.
Die talentaand is Saterdag gehou waartydens elke skool se skoonheidskonings en –koninginne die geleentheid gehad het om hul skool se uitvoerende kunstalent voor te stel.
Die naweek is Sondagoggend met ’n dankseggingsdiens afgesluit waarna die groot opruim begin het. Skaars 12 ure nadat die laaste gaste die sportterrein verlaat het, is die terrein se hekke gesluit en was alle tekens van 7 500 gaste uitgewis.
Volgens Moria is NAVCO se Privaatskolenaweek een van die hoogtepunte van 19 private skole in die land en staan dit bekend as ’n geleentheid waar ou kennisse en familie mekaar weer kom ontmoet om ’n hond uit ’n bos te kuier.
Dit begin ook bekendstaan as ’n geleentheid wat gebruik word deur die NAVCO-skolegemeenskap om die land se skole en sportgeriewe, en in Outjo se geval ook die dorp, op te knap en te verbeter.
Volgens woordvoerders van Moria bou die private skole-gemeenskap die land met die besondere jaarlikse geleentheid op, want miljoene dollar word ingepomp om die geleentheid moontlik te maak.
Die skool en dorp bedank ’n ieder en ’n elk wat die geleentheid bygewoon en moontlik gemaak het. Sterkte word ook aan Swakopmund se Pro-ed Akademie toegewens wat volgende jaar die Privaatskolenaweek sal aanbied.
Ongeveer 7 500 ouers, onderwysers, leerlinge en afrigters het vanaf 4 tot 8 Junie op Outjo saamgedrom vir die jaarlikse Namibiese Afrikaanse Vereniging van Christelike Onderwys (NAVCO) se Privaatskolenaweek wat vanjaar deur die Privaatskool Moria aangebied is.
Leerlinge van privaatskole van oral in die land kon tydens die geleentheid kragte op die sportveld, kultuurgebied of selfs op die skaakbord meet.
Die aktiwiteite het die Woensdag met tennis, jukskei, skaak, en kulturele aktiwiteite begin.
Een van die hoogtepunte was die hoër- en laerskoolredenaars wat meegeding het. ’n Nuwe toevoeging tot die program, Spervuur, was ’n treffer. Hiervoor het skole in spanne meegeding en hul standpunte verdedig. Spervuur sal moontlik weer in komende jare aangebied word.
Die amptelike opening het die Donderdagaand plaasgevind met ’n massadeelname deur al Moria se leerlinge. Die naweek se tema was “Toeka tot Nou” en die vier pilare van onderwys by die skool, naamlik Godsdiens, akademie, sport en kultuur, is treffend deur groepsdanse uitgebeeld.
Donderdag, Vrydag en Saterdag het altesame 2 000 leerlinge van graad 1 tot graad 12 aan rugby, netbal en hokkie deelgeneem. Volgens woordvoerders van Moria was die sport van hoogstaande gehalte.
Vrydagaand het 1 200 mense heerlik saamgekuier en gedans tydens die steakbraai wat by Sophienhof Lodge gehou is. Die gelukstrekking waarin ’n Toyota-bakkie op die spel was, het ook tydens die geleentheid voor die oë van 1 200 opgewonde en afwagtende toeskouers plaasgevind. Me. E. Delport was die wenner van dié spogvoertuig. Michael Oosthuizen is N$20 000 ryker ná die gelukstrekking, terwyl Arno en Carina Human N$5 000 gewen het.
Die talentaand is Saterdag gehou waartydens elke skool se skoonheidskonings en –koninginne die geleentheid gehad het om hul skool se uitvoerende kunstalent voor te stel.
Die naweek is Sondagoggend met ’n dankseggingsdiens afgesluit waarna die groot opruim begin het. Skaars 12 ure nadat die laaste gaste die sportterrein verlaat het, is die terrein se hekke gesluit en was alle tekens van 7 500 gaste uitgewis.
Volgens Moria is NAVCO se Privaatskolenaweek een van die hoogtepunte van 19 private skole in die land en staan dit bekend as ’n geleentheid waar ou kennisse en familie mekaar weer kom ontmoet om ’n hond uit ’n bos te kuier.
Dit begin ook bekendstaan as ’n geleentheid wat gebruik word deur die NAVCO-skolegemeenskap om die land se skole en sportgeriewe, en in Outjo se geval ook die dorp, op te knap en te verbeter.
Volgens woordvoerders van Moria bou die private skole-gemeenskap die land met die besondere jaarlikse geleentheid op, want miljoene dollar word ingepomp om die geleentheid moontlik te maak.
Die skool en dorp bedank ’n ieder en ’n elk wat die geleentheid bygewoon en moontlik gemaak het. Sterkte word ook aan Swakopmund se Pro-ed Akademie toegewens wat volgende jaar die Privaatskolenaweek sal aanbied.
Kommentaar
Republikein
Geen kommentaar is op hierdie artikel gelaat nie