Pritzen daag Hoffmann uit in Tour de Windhoek

Andrew Poolman - Die mededinging en internasionale geur van die Pupkewitz Tour de Windhoek fietstoer het die afgelope twee jare reeds goed opgewarm en komende naweek sal geen uitsondering wees nie.Die verdedigende kampioen, Nolan Hoffmann, se Team Enza is een van ses prominente Suid-Afrikaanse beroepspanne wat die vyf skofte binne drie dae in en om die heuwelagtige hoofstad van Namibië kom betwis. Hy kan hom egter vet smeer vir 'n jaagtog teen die OfficeGuru-span vir wie die Suid-Afrikaanse o.23-kampioen Marc Pritzen die groot angel is. Pritzen is 'n gebore Namibiër, wie se broer Kai reeds die afgelope maande oorgeskakel het om met 'n Namibiese lisensie fiets te ry. Marc het onder meer tevore ook die Namibian Cycle Classic hier gewen.Altesame 16 spanne het vir die manskompetisie ingeskryf, asook ses vrouespanne (waarvan een van Suid-Afrika).Hoffmann, wat verlede jaar net 24 sekondes voor sy spanmaat David Maree klaargemaak het, het aan die webblad inthebunch.co.za gesê hy reken hy is nog nie naastenby op dieselfde vlak as verlede jaar nie, terwyl hy ook baie sterk kompetisie van die OfficeGuru-groep verwag.“Om vir die algehele spanoorwinning mee te ding, sal moeilik wees. Ons het verlede jaar die knoop deurgehaak deur die spantydtoets te wen, maar hierdie keer is ons ook sonder Steven van Heerden (algeheel derde in 2018), so dit sal moeilik wees.”Hoffmann sê hy is teen dié tyd redelik vertroud met die Namibiese paaie en beskou dié kennis as 'n pluspunt. “Die roetes is 90 persent dieselfde, behalwe vir 'n paar veranderinge in die spantydtoets.”Verlede jaar se wenner van die rooi trui vir die beste Namibiese jaer, Drikus Coetzee (Hollard), sal die naweek misloop. Coetzee bevind hom in Europa, waar hy volgende week in Frankryk vir die UCI wêreldkampioenskap se individuele tydtoets sal aantree. VROUEIn die vrouetoer sal Michelle Vorster, die Namibiese Olimpiese ryer, ná haar herstel van 'n gebreekte enkel in 'n padongeluk haar terugkeer tot kompetisie maak. Vorster is die spankaptein van die Pupkewitz-vrouespan wat vir die eerste keer twee jong Suid-Afrikaners (Courtney Webb en Danielle Strydom) saam met Courtney Liebenberg en Jeanne Heunis sal bevat. “Ons is opgewonde oor die toer en om vir die buurland se vroueryers te wys waar ons fietsry,” sê Vorster.Prysgeld van N$12 000 wag op die algehele individuele manswenner, met N$5 000, N$3 000 en N$2 000 wat vir die volgende drie plekke opsy gesit is.Terselfdertyd wag daar afsonderlike prysgeld op die beste span (N$7 000) asook N$5 000 elk vir die koning van die bergskofte, die beste naelryer, die beste jong ryer en die beste Namibiese presteerder.Die Tour de Windhoek vir vroue se prysgeld beloop onder meer N$10 000, N$6 500 en N$3 500 vir die voorste drie individue, tesame met dieselfde kategorietoekennings as by die mans.Die uitleg van die toer is soos volg: VANDAGSkof 1 (08:00), padresies (107 km) by die Dordabis afdraai, met die omdraaipunt ná 53.5 km. Die vrouetoer se afstand is 66 km.Skof 2 (16:00), tydtoets vir spanne (15.6 km km totaal; ses rondtes van 2.6 km), anti-kloksgewys rondom die Tony Rust-renbaan. Die vroue se afstand is 10.4 km (vier rondtes). MÔRESkof 3 (08:00), padresies (90 km) op die westelike verbypad met wegspring by Pupkewitz Megabuild en die eindstreep by die Brakwater-brug (noord). Die vroue se afstand is 66 km.Skof 4 (17:00), kriterium in die middestad (baanrondte 1.7 km) met Pupkewitz Megabuild as die wegspringpunt en eindstreep. Die Snymansirkel, Mandume Ndemufayo-rylaan en Lazarettstraat word ingesluit. Dié item is nie deel van die vrouetoer nie. SONDAGSkof 5 (80 km) by Tony Rust-renbaan (08:00). Sluit twee rondtes na Monte Christo en twee na Matchless in. Die vrouetoer se afstand is 53 km. Dit word om 12:00 deur die algehele prysuitdeling gevolg.

Pritzen daag Hoffmann uit in Tour de Windhoek

Kommentaar

Republikein 2025-09-17

Meld asseblief aan om kommentaar te lewer

Pritzen daag Hoffmann uit in Tour de Windhoek

Kommentaar

Republikein 2025-09-17

Meld asseblief aan om kommentaar te lewer

MELD AAN

Advertensie