Prins William kom kuier

Francoise Steynberg - Prins William gaan Maandag vir die eerste keer amptelik in Namibië kom kuier ná sy rooikop broer, Harry, die land al 'n paar keer besoek het. Volgens 'n verklaring van Kensington-paleis is die hertog van Cambridge se twee dae lange besoek deel van sy reis na Afrika om voorbrand te maak vir die Britse regering se Onwettige Wildhandel-konferensie wat op 11 en 12 Oktober in Londen sal plaasvind. Hy sal ook Tanzanië en Kenia op sy reis na Afrika besoek. Prins William is die eerste Britse koninklike wat 'n amptelike besoek aan Namibië gaan bring nadat koningin Elizabeth II in 1991 in die land kom kuier het. Hy sal onder meer die adjunkpresident, mnr. Nangola Mbumba, ontmoet, asook 'n geleentheid van die Britse hoë kommissaris, me. Kate Airey, bywoon om uitstekende Brits-Namibiese betrekkinge te vier. Prins William sal sleutelrolspelers in bewarings-, besigheids- en nywerheidskringe ontmoet, asook verteenwoordigers van die jeug en geestesgesondheidsorg van Namibië.Die doelwit van die Onwettige Wildhandel-konferensie is om internasionale vennootskappe oor grense en regerings heen te versterk met die fokus op drie temas: die stryd teen onwettige wildhandel as georganiseerde misdaad, die bou van koalisies en die sluit van onwettige wildproduktemarkte. Prins William is die president van United for Wildlife en het in 2009 die Tusk-trust se koninklike beskermheer geword. Tusk is 'n organisasie wat hom vir die bevordering van bewaring in 20 Afrikalande beywer. Tusk bied tans 'n uitstalling van renosterbeelde by bekende landmerke in Londen, genaamd die Tusk Rhino Trail, aan wat tot Wêreldrenosterdag op 22 September sal duur. Prins William het ook onlangs gaan kyk na die kleurryk versierde renosterbeelde wat op 9 Oktober deur die Londense afslaer Christie's opgeveil sal word.Die prins is naas sy pa, prins Charles, tweede op die ranglys om die Britse troon te bestyg. Die hertog van Cambridge is getroud met Catherine en hulle het drie kinders, prins George, prinses Charlotte en prins Louis.Die paartjie beywer hulle ook vir geestesgesondheid.

Prins William kom kuier

Kommentaar

Republikein 2025-05-02

Meld asseblief aan om kommentaar te lewer

Prins William kom kuier

Kommentaar

Republikein 2025-05-02

Meld asseblief aan om kommentaar te lewer

MELD AAN

Advertensie