Pret op die strand sal net groter word

’n Baie gewilde strandsokkertoernooi vir jeugspanne van vyf aan ’n kant is onlangs by die Onafhanklikheidstrand in Kuisebmund aangebied. ’n Gesonde getal seuns en meisies van Kuisebmund, Narraville en die omliggende buurte het in die toernooi deelgeneem, wat ook goed deur toeskouers ondersteun is.

Altesame 110 meisies in twee ouderdomsgroepe en 84 seuns in drie ouderdomsgroepe (totaal 194 kinders) het hul vernuf in strandsokker op die proef gestel.

Strandsokker soos dit in Brasilië ontstaan en sedertdien wêreldwyd gegroei het, word kaalvoet gespeel en plaas groot klem op ratsheid, vaardigheid en akkurate skoppe na die doelkas.

Die dribbelwerk, akrobatiese spel in die lug en skeppende spel is aspekte wat dié vinnige speltipe so opwindend maak. Dit word as een van die snel groeiende sporte wêreldwyd beskou en is sinoniem met die son, see en sand.

Die toernooi is gereël onder die leierskap van PlayTime Namibia Youth Sport Deployment Trust, ’n organisasie sonder winsbejag op Walvisbaai wat daarop ingestel is om die plaaslike jeug deur middel van sport te ontwikkel.

PlayTime maak reeds goeie vooruitgang en bou ’n hoër profiel dwarsoor die land, te danke aan sy professionele ingesteldheid. Die toernooi op Kuisebmond se strand was die eerste van sy soort in die land se geskiedenis en die organiseerders is gretig om jaarliks hierop voort te bou.

“Die volgende toernooi sal nog verder uitgebrei word en ons sal spanne van alle streke in die land nooi om hier te kom meeding,” sê Osvaldo Dos Santos, afrigter en hooftoesighouer van die toernooi.

Ná afloop van die groepwedstryde was die uitslae van die uitklopwedstryde soos volg:

Seuns onder 11, semifinale: Maroon Waves klop Orange Desert 1-0; Silver Seals klop Green Ocean 1-0. Finaal: Maroon Waves klop Silver Seals 3-0.

Seuns onder 13, semifinale: Black Sun klop Golden Eagles 4-2; Hungry Hyenas klop Purple Rain 3-1. Finaal: Black Sun klop Hungry Hyenas 5-4.

Seuns onder 15, semifinale: Blue Storms klop Red Sands 6-2; Yellow Flood klop Green Ocean 2-1. Finaal: Blue Storms klop Yellow Flood 4-0.

Meisies onder 11, semifinale: Golden Cheetahs klop Pink Kudus 3-2; Golden Strikers klop Blue Leopards 6-4. Finaal: Golden Strikers klop Golden Cheetahs 2-1.

Meisies onder 13, semifinale: Blue Giraffes klop Yellow Zebras 3-0; Purple Revolution klop Golden Eagles 4-3. Finaal: Blue Giraffes klop Purple Revolution 2-1.

“Vir die kinders was die ondervinding iets nuuts. Dit was groot pret om nuwe vriende uit elke deel van ons gemeenskap te maak en tydens die wedstryde het ons skouspelagtige vaardighede van die jongelinge gesien,” sê Dos Santos.

Namens PlayTime Namibia, het Dos Santos die res van sy bestuurslede (trustees) bedank vir hul bydrae tot ’n toernooi wat vlot afgeloop het. Hulle is Sandro de Gouveia, Alex Kirov, Mick Sheehan (sportdirekteur), Gareth Amos (hoof van bemarking), Steven Damaseb, Boy-Boy Ndjadila (hoofskeidsregter), Hendrik Kaboy, Marius J. Persens, Dolphy Campbell, Tana, Desire Nnyoma, Romy Gros, Rivan en al die afrigters en ouers.

“Ons het ook waarderings vir die borge soos Sport-On, Tunacor, Cavema Fishing, Namibia Chip Chandlers, die Walvisbaai munisipaliteit, Medic Aid (mnr. Brando) en elke ander rolspeler wat bygedra het om ons toernooi so ’n sukses te maak,” sê Dos Santos.

Hy moedig belangstellendes aan om op hul Facebook-blad (PlayTimeNamibia) op die hoogte van verwikkelinge te bly.