Presidente vryf mekaar blink

Pres. Donald Trump van Amerika is 'n "goedgemanierde persoon en maklik om mee oor die weg te kom". Dit is die mening van pres. Wladimir Poetin van Rusland.

Trump het op sy beurt gesê: "Ons (hy en Poetin) blyk 'n goeie gevoel vir mekaar te hê, 'n goeie verhouding in ag genome dat ons mekaar nie goed ken nie."

Die twee leiers het mekaar hierdie lof toegeswaai tydens die vergadering van die forum vir ekonomiese samewerking in die Asies-Pasifiese streek, (Apec) in Da Nang, Viëtnam.

Poetin het gesê hy is spyt dat hy nie langer met Trump kon praat nie. Hulle het "twee of drie keer" kortliks met mekaar gepraat.

Volgens Trump go hy Poetin voel beledig deur aantygings van Russiese inmenging in die Amerikaanse presidentsverkiesing.

"'n Mens kan slegs soveel keer vra . . . hy het gesê hy het beslis nie in ons verkiesing ingemeng nie," het Trump gesê.

Trump het tot dusver geweier om te erken dat Rusland verantwoordelik was vir die kuberinbraak by die Demokratiese Nasionale Komitee in die aanloop tot die verkiesing, soos wat die konsensus is onder die Amerikaanse intelligensiegemeenskap.

Kuberkrakers het na bewering duisende e-posse laat uitlek met die doel om die verkiesing in Trump se guns te laat swaai en sy teenstander, Hillary Clinton, te benadeel.

Putin het op sy beurt die beweringe van Russiese inmenging deur middel van kontakte in Trump se veldtog afgemaak. "Alles rakende die sogenaamde Russiese dossier in die VSA is n manifestasie van huishoudelike politieke wedywering."

*Poetin en Trump het volgens die Kremlin ook op die Apec-vergadering ooreengekom op 'n gesamentlike verklaring oor Sirië wat lui dat hulle sal voortgaan met gesamentlike pogings om die Islamitiese terreurbeweging Isis te beveg totdat hy oorwin is. Die Withuis het nie dadelik op vrae oor die Kremlin-aankondiging gereageer nie. – Netwerk24/Nampa/Reuters