President se begroting met amper N$200 miljoen gesny

Estelle de BruynTeen die agtergrond van fiskale konsolideringsmaatreëls wat daarop gemik is om openbare besteding aan bande te lê, is die begrotingspos van die president vanjaar met N$197 025 000, of 32%, gesny. Waar dit in die 2017-’18 finansiële jaar N$608 535 000 was, sal dit vanjaar N$411 510 000 wees.Die begrotingspos is Dinsdag tydens die komiteestadium van die nasionale begroting in die Nasionale Vergadering (NV) deur die nuutaangestelde minister van presidensiële sake, amb. Martin Andjaba, gemotiveer.Van die begrote bedrag gaan N$375 519 000 vir operasionele uitgawes en N$35 991 000 vir die ontwikkelingsbegroting. ‘n Bedrag van N$86 939 000 is van die operasionele begroting en N$110 086 000 van die ontwikkelingsbegroting gesny.Die program vir toesighouding en ondersteuningsdienste behels ondersteuning vir die uitvoerende tak van die regering om in die nasionale belang op te tree en die waardigheid van die kantoor van die president in stand te hou, asook om te verseker dat die Namibië Sentrale Intelligensiediens bedreigings en potensiële bedreigings vir Namibië waarneem en vrede, sekuriteit en stabiliteit in die land handhaaf.‘n Bedrag van N$160 623 000 is hiervoor bewillig.In die program vir marginaliseerde gemeenskappe en mense met gestremdhede is N$65 807 000 vir eersgenoemde en N$19 437 000 vir laasgenoemde toegeken.Volgens Andjaba is die program daarop gemik om die kwesbaarste gemeenskappe in die samelewing se lewensomstandighede te verbeter en hulle in “die breër stroom van die Namibiese Huis” te integreer. Dit is veral op die San, Ovatue en Ovatjimba-gemeenskappe gerig. Daar word veral op onderrig van jongmense van die San-gemeenskap gefokus. Begunstigdes word geïdentifiseer en by skole en universiteite ingeskryf. Hierbenewens word permanente skoolgeboue en behuising vir onderwysers opgerig.Hierdie gemarginaliseerde gemeenskappe word ook die swaarste getref deur die feit dat hulle nie grond tot hul beskikking het nie. Gevolglik is honderde lede van die gemeenskappe reeds in sowel kommunale as kommersiële gebiede hervestig, sê Andjaba.‘n Verdere program in die kantoor van die president maak voorsiening vir die beskerming van die grondwet. ‘n Bedrag van N$80 858 000 is bewillig vir die uitvoering van uitvoerende funksies, die aanbied en onderneem van staats- en amptelike besoeke om diplomatieke betrekkinge met die internasionale gemeenskap te versterk asook om handel, belegging en ekonomiese ontwikkeling te bevorder.Onder die program “die konsolidering en bevordering van demokrasie” is N$13 098 000 begroot vir onder meer goeie staatsbestuur en om vrede en stabiliteit te bevorder. Dit sluit in die lede van die president se adviesraad, die uitvoering van seremoniële funksies op uitnodiging van die openbare- en private sektore, die bywoning van amptelike funksies binne en buite Namibië soos onder meer vereis word deur take wat aan “Bejaarde staatshoofde” deur die Suider-Afrikaanse Ontwikkelingsgemeenskap (SADC) en die Afrika-unie opgelê word.Andjaba het daarop gewys dat waar moontlik pres. Hage Geingob met kommersiële lugrederye gevlieg het en die grootte van die afvaardigings wat hom vergesel verklein het.

President se begroting met amper N$200 miljoen gesny

Kommentaar

Republikein 2025-12-19

Meld asseblief aan om kommentaar te lewer

President se begroting met amper N$200 miljoen gesny

Kommentaar

Republikein 2025-12-19

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.