Pollard teken vir Leicester

Leicester, die voorlopers in die Engelse premierliga, het Dinsdag die ondertekening van die Suid-Afrikaanse Wêreldbekerlosskakel Handre Pollard aangekondig. Hy sal vir die 2022-’23-seisoen by die klub aansluit.

Die 27-jarige Pollard wat in die Springbokspan was wat Engeland in die 2019 Wêreldbeker-eindstryd geklop het, sal hom by die Tigers van Leicestershire aansluit.

Sy aankoms sal die losskakel-leemte vul wat volgende jaar deur Engeland se George Ford se skuif van Leicester na Sale geskep is.

Leicester se hoofafrigter, Steve Borthwick, het gesê: "Handré is 'n wêreldklas-losskakel wat 'n rykdom van ervaring van Superrugby, Top 14- en internasionale rugby saam met hom bring.

"Hy is 'n Wêreldbeker-wenner wat baie gesog by klubs oraloor die wêreld is. Dit is aangenaam dat hy Leicester Tigers as die regte klub vir hom beskou."

Pollard het gesê hy is opgewonde om by 'n baie "spesiale klub" aan te sluit, wat al nege hul premierskapwedstryde tot dusver hierdie seisoen gewen het, maar sedert 2013 nie as Engelse kampioene gekroon kon word nie.

"Die klub speel briljante rugby op die oomblik en ek weet daar word verwagting van mense gekoester van ons om voort te gaan daarmee. Jy moet konstant verbeter, want dis moeilik om die beste te word, maar dit is nog moeiliker om bo te bly.

"Daar was groter aanbiedings op die tafel gewees, maar ek het hierdie besluit geneem om saam met Steve te werk en deel te wees van 'n buitengewone groot klub by Leicester Tigers wat so 'n groot en ryk geskiedenis het," het hy gesê. - AFP