Politici, howe besluit Maandag oor LPM

Augetto Graig – Die ontwrigtende kwessie van die deelname van Landless People’s Movement (LPM) se leiers mnre. Bernadus Swartbooi en Henny Seibeb gedurende die verrigtinge in die Nasionale Vergadering (NV) kom Maandag in fokus. Die parlementskomitee oor voorregte moet ook hieroor vergader op aanbeveling van die vaste komitee oor reëls en bevele, wat die Speaker prof. Peter Katjavivi se bevel gehandhaaf het om Swartbooi en Seibeb te laat uitsmyt. Katjavivi het die twee LPM-leiers uit die parlement verban ná hul gedrag gedurende president Hage Geingob se vraag-en-antwoordsessie van sy jaarlikse staatsrede. Intussen het Swartbooi en Seibeb se prokureurs, Dr. Weder, Kauta en Hoveka, ’n dringende aansoek by die Hoërhof in Windhoek ingedien om Katjavivi se bevel onwettig te laat verklaar en tersyde te stel. Regter Kobus Miller sal Maandag vanaf 10:00 dié saak verhoor. Hofdokumente dui aan Swartbooi dring aan op die wetlike beperking van die Speaker se magte om parlementslede van betrokkenheid in die parlement te weerhou – veral in die huidige stadium terwyl die nasionale begroting bespreek word. Spesifiek, sê Swartbooi, pas Katjavivi reëls 111, 112, 113 en 124 van die Staande Reëls en Bevele en Interne Reëlings verkeerd toe. “Die respondent het geen ander magte, ingevolge hierdie reëls, om opdrag te gee vir die onttrekking van ’n lid nie – nie eens in afwagting op ’n aanbeveling van die vaste komitee op reëls, bevele en interne reëlings nie,” skryf Swartbooi. Hy sê dit is growwe magsmisbruik en teen die grondwet om “verteenwoordigers van die wil van die bevolking” van deelname in wetskepping te verbied. Katjavivi noem op sy beurt ’n lys voortdurende onderbrekings en ontwrigtende gedrag deur Swartbooi en Seibeb, in die aanloop tot sy besluit van 15 April. Op daardie dag het Swartbooi en Seibeb die sake van die parlement belemmer tot op die punt waar die Speaker hulle moes versoek om die vertrek te verlaat. Katjavivi moes die wapensersant en later die parlementêre sekuriteitsbeamptes vra om te help om die twee LPM-leiers te verwyder, sê hy. “Terwyl hy deur die sekuriteitsbeampte na buite vergesel is, het hy (Swartbooi) die Staf van die Huis gegryp en dit in die rigting van die president gegooi. Die staf is in die lug deur ’n lid van die sekuriteitsdienste gevang. As die sekuriteitsbeampte nie ingegryp het nie, kon die staf die president getref en beseer het,” sê Katjavivi oor Swartbooi se optrede. “Ek is intussen deur verskeie lede van die parlement benader, wat ernstig vir hul veiligheid vrees indien die aansoekers toegelaat word om, voordat die dissiplinêre prosedure nie afgehandel is nie, die parlement by te woon, asook lede wat die aansoekers se gedrag as onduldbaar beskou,” lees sy verklaring in antwoord tot die hofaansoek. – augetto@republikein.com.naFOTODie LPM-leierskap se spoedige herstel van deelname in Namibië se parlement word Maandag op die spel geplaas. Foto Harald Süpfle

Politici, howe besluit Maandag oor LPM

Kommentaar

Republikein 2025-06-18

Meld asseblief aan om kommentaar te lewer

Politici, howe besluit Maandag oor LPM

Kommentaar

Republikein 2025-06-18

Meld asseblief aan om kommentaar te lewer

MELD AAN

Advertensie