Polisiemanne naby Giza-piramides doodgeskiet

Gewapende mans op ‘n motorfiets het Vrydag vyf polisiemanne naby Egipte se oudste piramides by Giza doodgeskiet.
Die skietery het in die vroeë oggendure in die Abusir-nedersetting in Badrashin plaasgevind, wat deel van die groter Kaïro-gebied is.
Die polisiemanne was deel van ‘n taakmag wat die Saqqara-distrik bewaak.
Dit is een van Egipte se gewildste toeristeattraksies en beskik oor antieke tempels, tombes en begrafniskomplekse.
Owerhede het die gebied afgesper en ambulanse het na die toneel naby die bekende trappiramiede van koning Djoser gejaag.
Dit is die oudste van Egipte se meer as 90 piramides en die voorloper van die reguitkantige piramides van Giza aan die buitewyke van Kaïro.
Die aanvallers het die slagoffers se wapens en radio's gesteel en probeer om hul oorskot aan die brand te steek.
Volgens die ministerie van binnelandse sake het die militante met masjiengewere losgebrand op die polisievoertuig wat op patrollie was.
Dié aanval kom ‘n week ná Islamitiese militante 23 weermagpersoneellede op die Sinai-skiereiland doodgeskiet het.
‘n Noodtoestand is sedert April in Egipte van krag nadat selfmoordbomaanvallers twee Koptiese kerke noord van Kaïro aangeval het en talle Christene dood is.
Rebelle het sedert 2013, toe die verkose Islamitiese president se bewind omvergewerp is, verskeie aanvalle in Egipte uitgevoer.
Geweldpleging is in die noordelike Sinai-skiereiland gekonsentreer, maar aanvalle het sedertdien na die binneland versprei, insluitende die hoofstad, waar selfmoordbomaanvallers kerke en veiligheidshoofkantore geteiken het.
‘n Groep wat met die Islamitiese Staat-groep (IS) verbind is, het aanspreeklikheid vir die grootste aanvalle aanvaar.
‘n Skadugroep, bekend as Hasm, of "Beslistheid", het egter aanspreeklikheid aanvaar vir soortgelyke aanvalle waarin die polisie, weermag, regters en proregeringsfigure uit bewegende voertuie aangeval is.
Die groep het bande met die Moslembroederskap wat uit die land verban is.
Die Broederskap het in 2011 in ‘n reeks verkiesings geseëvier wat gehou is ná die opstand wat die eertydse diktator, Hosni Mubarak, uit die kussings gelig het. Die Broederskap se leier, Mohammed Morsi, is die volgende jaar as Egipte se eerste vrylik verkose president aangewys. Sy kort bewind was egter hoogs verdelend en die weermag het in 2013 sy bewind omvergewerp waarna die Broederskap as ‘n terroristegroep verklaar is.
Twee weke gelede het IS verantwoordelikheid aanvaar vir ‘n motorbomaanval op ‘n weermagbuitepos op die Sinai-skiereiland waarin minstens 23 soldate dood is. Dit was die dodelikste aanval in die rustelose streek in twee jaar.
Op dieselfde dag het Hasm daarop aanspraak gemaak dat hulle ‘n polisieman doodgeskiet het toe hy op pad na Vrydag se gebede was. - Nampa/AP