Polisiekantoor op Rundu sonder brandstof

Die polisiekantoor op Rundu sukkel die afgelope paar weke om sy voertuie met brandstof te vul. Volgens die Namibiese polisie se streeksbevelvoerder vir Kavango-Oos, komm. Johanna Ngondo raak die gebrek aan brandstof nie net die streek nie, maar die hele land. Volgens haar is daar egter wel brandstof by polisiekantore op Omega en Mukwe beskikbaar. Ngondo sê voorts die brandstof beskikbaar word net gebruik vir operasionele kwessies en om op noodgevalle te reageer. Polisiebeamptes sê intussen dit beteken die voertuie het nie genoeg brandstof om hulle by hul huise op te tel en werk toe te neem nie. Van die beamptes woon in Kehemu of Ndama wat ver van die polisiekantoor geleë is. - Nampa