Polisie soek polisswendelaar

Elvira Hattingh

NamPol het verlede week ’n waarskuwing uitgereik oor ’n nuwe slenter waarmee bedrieërs naasbestaandes van oorledenes kontak in verband met soge­naamde begraf­nispolisse, vra dat geld deur middel van selfoonbankdienste na hulle oorgeplaas word en dan verdwyn.
Volgens die polisie kry swendelaars inligting oor oorledenes in koerante, kontak dan hul naasbestaandes en beweer dat hulle van die een of ander versekeringsmaatskappy of bank bel waar die oorledene kwansuis ’n begrafnispolis gehad het.
Die swendelaars sal dan vra dat die naasbestaandes ’n bedrag van tussen N$1 500 en N$2 000 by wyse van selfoonbankdienste na hul rekening oorplaas om die uitbetaling van die polis te bespoedig.
Ná die geld ontvang is, verdwyn die swendelaars.
Die polisie het twee verdagtes in verband hiermee in hegtenis geneem, terwyl ’n derde hulle ontglip het. Mnre. Salamo Namiseb en Romeo Brand het reeds in die hof verskyn en is op borgtog van N$3 000 elk vrygelaat, maar die polisie is nog op soek na die 25-jarige mnr. Marshall Kavari. Enige een wat weet waar hy is, moet vir speurinspekteur Kaura by 081 243 6482 of speursersant Mubula by 081 845 3358 skakel of met hul naaste polisiekantoor in verbinding tree.
Terselfdertyd het ’n leser oor ’n soortgelyke geval aan Republikein geskryf, waarin ’n konsultant genaamd Riaan haar glo van ’n bekende plaaslike bank geskakel het om geld van ’n bekende versekeringsmaatskappy aan haar uit te betaal. Die geld behoort glo aan haar ma.
Volgens die leser het Riaan gesê die tipe uitbetalings kan slegs deur ’n spesifieke bank se selfoonbankdienste gedoen word. Toe sy sê sy het nie selfoonbankdienste nie, het Riaan haar telefonies gehelp om daarvoor te registreer.
Hy het haar deur die stappe tot by die afdeling geneem waar sy geld sou moes oorplaas, toe sy agterdogtig begin raak en weier om enige iets verder te doen. Sy het gesê sy sal liewer na die bank gaan vir hulp omdat sy nie met selfoonbankdienste vertroud is nie.
“Toe ek sê ek dink hy is besig om my te besteel, het hy ongeduldig geraak en gesê dat hy nooit sy loopbaan so sal verwoes deur in bedrog betrokke te raak nie en dat hy ’n familie het om aan te dink. Hy kon my ma se presiese polisnommer asook die presiese bedrag verskaf wat in haar spaarrekening is. Ná ek gesê het ek dink hy is ’n dief, het die telefoon doodgegaan.”
Die leser sê daarna kon sy nie toegang tot haar selfoonbankdienste kry nie omdat sy nie haar kode gehad het nie. Die swendelaar het egter die kode gehad en sy het haar bank dadelik geskakel om enige selfoonbankdienste te staak. Sy het ook die plaaslike versekeringsmaatskappy gebel, wat gesê het dat hulle niemand opdrag gegee het om geld aan haar of haar ma uit te betaal nie.
“Ek beskou myself as ’n geleerde vrou met ’n nagraadse kwalifikasie, maar ek het so amper geval vir hierdie foefie. Namibiërs moet nie sommer net transaksies deur middel van selfoonbankdienste aangaan nie.”