Polisie skiet op man wat vir rower aangesien is
Die Namibiese polisie het Saterdag op ’n man in Windhoek geskiet nadat hulle gedink het hy was by die transito-rooftog Dinsdag op Okahandja betrokke waarin N$900 000 gesteel is.
Mnr. Wapale Kalla (27) het Donderdag om 23:50 in Albatrossstraat in Hochland Park by ‘n gastehuis, wat deur sy familie besit word, stilgehou. Hy het ’n geparkeerde voertuig met vyf mans naby die gastehuis gewaar.
Kalla was nie bewus daarvan dat hulle polisiebeamptes in siviele klere was en na ’n verdagte in dié rooftog gesoek het nie.
Hy beweer dat hulle hulself nie geïdentifiseer het nie en dat hy in sy voertuig geklim en weggery het omdat hy onder die indruk was dat hulle rowers was.
Die polisie voer aan hulle hét hulself geïdentifiseer en het slegs op die voertuig begin skiet toe Kalla probeer wegkom het.
“Toe ek die voertuig sien, het ek gedink dit is rowers wat die gastehuis wil beroof. Ek het ook ’n man met ’n geweer gesien en het onmiddellik weggery,” het Kalla aan Nampa gesê.
Hy het homself oorgegee nadat die polisie skote afgevuur het.
Altesaam 26 skote is op die voertuig afgevuur.
“Ek het uit die voertuig geklim met my hande in die lug en het vir hulle gesê hulle kan alles vat, hulle moet my net nie doodmaak nie, aangesien ek toe steeds gedink het hulle is rowers,” het Kalla gesê.
'n Woordvoerder van die Namibiese polisie, insp. Pendukeni Haikali, het die voorval bevestig en gesê dit was deel van ’n gesamentlike operasie tussen polisie in die Khomas- en Otjozondjupastreek se afdelings vir ernstige misdaad.
’n Veiligheidswag is Dinsdag op Okahandja deur drie mans van N$900 000 beroof.
Een van die verdagtes het die veiligheidswag vanuit ’n sedanvoertuig in ’n lokval gelei, terwyl die twee ander verdagtes in die veiligheidsvoertuig geklim het en die geld gesteel het. Die man het die wag agter in die voertuig toegesluit.
“Die inligting wat ons ontvang het, is dat ‘n verdagte in ’n soortgelyke voertuig (as wat Kalla bestuur het) gevlug het en dat hy by die gastehuis ingeteken was. Dít is hoe die misverstand gebeur het,” het Haikali gesê.
Sy hou vol die polisiebeamptes het hulself geïdentifiseer.
“Hulle het gesê wie hulle is, maar hy het in sy voertuig gespring en sonder rede weggery, waarná die polisie begin skiet het,” het sy gesê.
Haikali het ook gesê daar is geen polisiekentekens op voertuie van die afdeling vir ernstige misdaad nie en dié beamptes dra geen uniform nie.
Intussen het verskeie WhatsApp-groepe vir misdaadbekamping foto's van ’n moontlike verdagte in die rooftog versprei.
Daar is ook versoek dat grensposte hiervan in kennis gestel word, omdat gevrees word die verdgate kan, weens beweerde bande met Suid-Afrika, daarheen vlug. - Eie berig en Nampa
Mnr. Wapale Kalla (27) het Donderdag om 23:50 in Albatrossstraat in Hochland Park by ‘n gastehuis, wat deur sy familie besit word, stilgehou. Hy het ’n geparkeerde voertuig met vyf mans naby die gastehuis gewaar.
Kalla was nie bewus daarvan dat hulle polisiebeamptes in siviele klere was en na ’n verdagte in dié rooftog gesoek het nie.
Hy beweer dat hulle hulself nie geïdentifiseer het nie en dat hy in sy voertuig geklim en weggery het omdat hy onder die indruk was dat hulle rowers was.
Die polisie voer aan hulle hét hulself geïdentifiseer en het slegs op die voertuig begin skiet toe Kalla probeer wegkom het.
“Toe ek die voertuig sien, het ek gedink dit is rowers wat die gastehuis wil beroof. Ek het ook ’n man met ’n geweer gesien en het onmiddellik weggery,” het Kalla aan Nampa gesê.
Hy het homself oorgegee nadat die polisie skote afgevuur het.
Altesaam 26 skote is op die voertuig afgevuur.
“Ek het uit die voertuig geklim met my hande in die lug en het vir hulle gesê hulle kan alles vat, hulle moet my net nie doodmaak nie, aangesien ek toe steeds gedink het hulle is rowers,” het Kalla gesê.
'n Woordvoerder van die Namibiese polisie, insp. Pendukeni Haikali, het die voorval bevestig en gesê dit was deel van ’n gesamentlike operasie tussen polisie in die Khomas- en Otjozondjupastreek se afdelings vir ernstige misdaad.
’n Veiligheidswag is Dinsdag op Okahandja deur drie mans van N$900 000 beroof.
Een van die verdagtes het die veiligheidswag vanuit ’n sedanvoertuig in ’n lokval gelei, terwyl die twee ander verdagtes in die veiligheidsvoertuig geklim het en die geld gesteel het. Die man het die wag agter in die voertuig toegesluit.
“Die inligting wat ons ontvang het, is dat ‘n verdagte in ’n soortgelyke voertuig (as wat Kalla bestuur het) gevlug het en dat hy by die gastehuis ingeteken was. Dít is hoe die misverstand gebeur het,” het Haikali gesê.
Sy hou vol die polisiebeamptes het hulself geïdentifiseer.
“Hulle het gesê wie hulle is, maar hy het in sy voertuig gespring en sonder rede weggery, waarná die polisie begin skiet het,” het sy gesê.
Haikali het ook gesê daar is geen polisiekentekens op voertuie van die afdeling vir ernstige misdaad nie en dié beamptes dra geen uniform nie.
Intussen het verskeie WhatsApp-groepe vir misdaadbekamping foto's van ’n moontlike verdagte in die rooftog versprei.
Daar is ook versoek dat grensposte hiervan in kennis gestel word, omdat gevrees word die verdgate kan, weens beweerde bande met Suid-Afrika, daarheen vlug. - Eie berig en Nampa
Kommentaar
Republikein
Geen kommentaar is op hierdie artikel gelaat nie