Polisie ondersoek steeds smokkelary
Jessica Botes
Twee vermeende smokkelaars het in die Windhoekse landdroshof beswaar gemaak teen die streng borgtogvoorwaardes wat in Februarie vir die toestaan van borgtog gestel is.
Mnre. Zhi Geng en James Barron Wallace wat daarvan beskuldig word dat hulle onwettig in beheerde wildleweprodukte handel gedryf het, is deur landdros Justine Asino gelas om nie die staatsgetuies en mekaar te kontak nie.
“Ons het sedert Februarie nog nie ’n lys van die staat se getuies ontvang nie, dus weet die beskuldigdes nie wie die persone is wat hulle nie mag kontak nie,” het mnr. Norman Tjombe betoog. Hy verteenwoordig vir Wallace.
Volgens hom het die verdediging die staat gehelp deur ’n naamlys van al die mense aan wie die beskuldigdes oorbetalings gemaak het, aan die staat te oorhandig. Tjombe het gesê dat Wallace ook betalings aan sy vrou en dogter gemaak het.
“Dit is prakties onmoontlik vir Wallace om nie kontak met sy familie te maak nie, indien hulle dalk staatsgetuies sal wees. Daar is dus ’n sterk moontlikheid dat hy sy borgtogvoorwaardes oortree, maar ons weet nie omdat ons nie ’n getuielys van die staat onvang het nie,” het Tjombe gesê.
Asino het gesê sy verstaan dat die beskuldigdes in ’n moeilike posisie geplaas is, maar dat die borgtogvoorwaardes onveranderd sal bly. Sy het ook gelas dat die staat ’n lys van sy getuies moet saamstel en dit aan die verdediging oorhandig.
Volgens staatsaanklaer Erastus Hatutale is die polisie steeds besig met sy ondersoek en het gevra die verhoor moet tot September uitgestel word.
“Die ondersoek is nog nie afgehandel nie en daar is nog baie wat gedoen moet word met betrekking tot die instruksies wat ons van die aanklaer-generaal se kantoor ontvang het. Ons wag ook nog vir uitslae van die laboratorium,” het hy gesê.
Beide beskuldigdes is ook destyds gelas om hul reisdokumente in te handig en nie om nuwe reisdokumente aansoek te doen nie. Hulle mag ook nie die Windhoek-distrik sonder die toestemming van die ondersoekbeampte verlaat nie.
Zhi moet twee keer per dag by die Windhoek-polisiekantoor aanmeld terwyl Wallace twee keer per week by adjunkinspekteur Louretha Tsuses, hoof van wildlewe van die beskermde hulpbronne-afdeling van die polisie se eenheid vir beskermde hulpbronne (PRU), moet aanmeld.
Die landdros het borgtog van onderskeidelik N$250 000 en N$30 000 aan Zhi en Wallace toegestaan.
Zhi staan tereg op klagte van onder meer die onwettige handel in olifanttande en renosterhorings, die invoer van beheerde wildleweprodukte sonder ’n permit, die handel in beheerde wildleweprodukte sonder ’n permit, die besit van ’n vuurwapen sonder ’n lisensie en die besit van ammunisie. Dít volg nadat die polisie op 1 Februarie 2016 Zhi se huis in Ludwigsdorf deursoek en op 1,15 kg renosterhoring ter waarde van N$91 000 afgekom het. Volgens die staat was die renosterhoring in 29 stukkies gesny. Die polisie het glo ook op ’n ongelisensieerde vuurwapen afgekom.
Wallace staan saam met Zhi tereg op die klag van die besit van beheerde wildleweprodukte sonder ’n permit. Die staat beweer 94 kg gedroogde perlemoen ter waarde van N$235 000 is in hul besit gevind.
Asino het die verhoor tot 19 September vir verdere ondersoek uitgestel.
Twee vermeende smokkelaars het in die Windhoekse landdroshof beswaar gemaak teen die streng borgtogvoorwaardes wat in Februarie vir die toestaan van borgtog gestel is.
Mnre. Zhi Geng en James Barron Wallace wat daarvan beskuldig word dat hulle onwettig in beheerde wildleweprodukte handel gedryf het, is deur landdros Justine Asino gelas om nie die staatsgetuies en mekaar te kontak nie.
“Ons het sedert Februarie nog nie ’n lys van die staat se getuies ontvang nie, dus weet die beskuldigdes nie wie die persone is wat hulle nie mag kontak nie,” het mnr. Norman Tjombe betoog. Hy verteenwoordig vir Wallace.
Volgens hom het die verdediging die staat gehelp deur ’n naamlys van al die mense aan wie die beskuldigdes oorbetalings gemaak het, aan die staat te oorhandig. Tjombe het gesê dat Wallace ook betalings aan sy vrou en dogter gemaak het.
“Dit is prakties onmoontlik vir Wallace om nie kontak met sy familie te maak nie, indien hulle dalk staatsgetuies sal wees. Daar is dus ’n sterk moontlikheid dat hy sy borgtogvoorwaardes oortree, maar ons weet nie omdat ons nie ’n getuielys van die staat onvang het nie,” het Tjombe gesê.
Asino het gesê sy verstaan dat die beskuldigdes in ’n moeilike posisie geplaas is, maar dat die borgtogvoorwaardes onveranderd sal bly. Sy het ook gelas dat die staat ’n lys van sy getuies moet saamstel en dit aan die verdediging oorhandig.
Volgens staatsaanklaer Erastus Hatutale is die polisie steeds besig met sy ondersoek en het gevra die verhoor moet tot September uitgestel word.
“Die ondersoek is nog nie afgehandel nie en daar is nog baie wat gedoen moet word met betrekking tot die instruksies wat ons van die aanklaer-generaal se kantoor ontvang het. Ons wag ook nog vir uitslae van die laboratorium,” het hy gesê.
Beide beskuldigdes is ook destyds gelas om hul reisdokumente in te handig en nie om nuwe reisdokumente aansoek te doen nie. Hulle mag ook nie die Windhoek-distrik sonder die toestemming van die ondersoekbeampte verlaat nie.
Zhi moet twee keer per dag by die Windhoek-polisiekantoor aanmeld terwyl Wallace twee keer per week by adjunkinspekteur Louretha Tsuses, hoof van wildlewe van die beskermde hulpbronne-afdeling van die polisie se eenheid vir beskermde hulpbronne (PRU), moet aanmeld.
Die landdros het borgtog van onderskeidelik N$250 000 en N$30 000 aan Zhi en Wallace toegestaan.
Zhi staan tereg op klagte van onder meer die onwettige handel in olifanttande en renosterhorings, die invoer van beheerde wildleweprodukte sonder ’n permit, die handel in beheerde wildleweprodukte sonder ’n permit, die besit van ’n vuurwapen sonder ’n lisensie en die besit van ammunisie. Dít volg nadat die polisie op 1 Februarie 2016 Zhi se huis in Ludwigsdorf deursoek en op 1,15 kg renosterhoring ter waarde van N$91 000 afgekom het. Volgens die staat was die renosterhoring in 29 stukkies gesny. Die polisie het glo ook op ’n ongelisensieerde vuurwapen afgekom.
Wallace staan saam met Zhi tereg op die klag van die besit van beheerde wildleweprodukte sonder ’n permit. Die staat beweer 94 kg gedroogde perlemoen ter waarde van N$235 000 is in hul besit gevind.
Asino het die verhoor tot 19 September vir verdere ondersoek uitgestel.
Kommentaar
Republikein
Geen kommentaar is op hierdie artikel gelaat nie