Polisie breek glo Havana-man se been

Michelline Nawatises – ’n Vyftigjarige kapanaverkoper van Havana aan die buitewyke van Windhoek, mnr. David Shambo, voer aan die polisie het hom die afgelope week aan gewelddadigheid onderwerp.Dié pa van sewe bedryf sy kapana-onderneming tydens die inperking van sy huis.Hy voer aan die polisie het hom Maandag omstreeks 10:00 só gewelddadig behandel dat sy been gebreek het.Volgens sy seun, mnr. Paulus Shambo (24), het polisiebeamptes in Havana opgedaag, uit hul vangwa geklim en na hul huis aangestap gekom toe hul sien vleis word verkoop. “Wie se vleis is dié?” wou hulle glo weet. Niemand het geantwoord nie.Volgens die seun het die polisie glo met ’n skerp toon gepraat, waarná sy pa gevra het dat hulle hofliker moet wees omdat sy jong sibbes teenwoordig was.Die polisie het glo toe vir David beveel om hulle te vergesel waarná hy wou weet: “Om wat te gaan doen en vir wat? Ek sal julle volg, maar kom ons doen dit in vrede.”Paulus sê hy het ook ’n beroep op die polisie gedoen om hulle nie tot geweld te wend nie. “My pa is gesleep tot sy broek afgeval het – stel jou voor ek moes dit sien.” ’n Ander man, wat glo die gebeure gesien ontvou het, mnr. Festus Hashavi, sê dit was vier polisielede teen David.Nadat David geboei is, het een beampte sy neus vasgehou, terwyl ’n ander se elmboog op sy ken was en die ander twee sy bene vasgehou het.Een beampte het toe glo op sy kop getrap en hom van sy huis na die hoofpad gesleep waartydens sy broek afgeval het.Een van die man se familielede, me. Monica Nambelela, beweer een van die beamptes sou gesê het: “Hy sal sien hoeveel mag ons het.”Dié vrou het ook gesê ’n skakelbeampte van die polisie het gesê die man het hom teen inhegtenisneming verset en dat hy beseer is omdat dit ’n klipperige area was.Nambelela dring aan op geregtigheid.“Sy huis is nie klipperig nie. Die polisiebeamptes moet geskors en ondersoek word. Ek is teleurgesteld dat die openbare skakelbeampte die polisiegewelddadigheid verdedig juis op ’n tydstip wat die wêreld verenig staan teen polisiegewelddadigheid.” Sy beweer ook die polisie het by Shambo gepleit om nie ’n klag teen die beamptes aanhangig te maak nie.Me. Elizabeth Shambo (43), die man se vrou, sê sy been is gebreek en hy kan nie sonder ondersteuning opstaan nie.Die polisie sê by monde van adj.komm. Kauna Shikwambi, die nasionale polisiewoordvoerder, die man het geweier om aan bevele van die owerhede gehoor te gee.Volgens haar is hy ingelig die perseel is nie geoormerk vir die verkoop van kapana nie. “Dit het tot ’n konfrontasie gelei, gevolg deur ’n gestoei wat tot die besering aan sy knie aanleiding gegee het.”Klagte van aanranding deur dreigement en dwarsboming is teen Shambo aanhangig gemaak. Hy word tans in ’n bestendige toestand in die Katutura-staatshospitaal onder polisiebewaking behandel, sê die woordvoerder.Shikwambi het ’n beroep op die publiek gedoen om die Covid-19-regulasies te gehoorsaam. “Ons veg teen ’n pandemie en nie teen mekaar nie. Daarom pleit ons vir samewerking van die publiek omdat ons nie ondermyn wil word terwyl ons ons werk doen nie.”- michelline@myzone.com.na

Polisie breek glo Havana-man se been

Kommentaar

Republikein 2026-07-31

Meld asseblief aan om kommentaar te lewer

Polisie breek glo Havana-man se been

Kommentaar

Republikein 2026-07-31

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.