Platsak staat kan nie werkers aflê

Mathias Haufiku – Die regering sê dit is nie in 'n finansiële posisie om die staatsdiens te verklein nie, want dit sal aansienlike skeidingspakkette beteken om vervroegde aftrede te motiveer.

Veranderinge wat in 2016 deur die kabinet voorgestel is om die staatsdiens in 'n kleiner en meer kostedoeltreffende struktuur te omskep, moet nog ten volle geïmplementeer word.

Met meer as 100 000 amptenare in die staatsdiens verslind die regering se salarisrol meer as 'n derde van die land se totale nasionale begroting.

In 2013 het die Internasionale Monetêre Fonds (IMF) kommer uitgespreek oor die groot aantal staatsdienswerknemers.

Die minister van finansies, mnr. Iipumbu Shiimi, het verlede week gesê personeelbesnoeiing is steeds op die regering se radar, maar nie veel kan sonder die nodige geld gedoen word nie. “As jy wil hê mense moet vroeër aftree, moet jy geld hê om hulle uit te betaal. Ons moet daardie geld vind,” het hy gesê.



OMSLAGTIG

Tydens 'n onderhoud in ­Namibian Sun se Evening Review-program, het Shiimi gesê die regering ondersoek maniere om s­taatsdiens­werknemers tussen die ouderdom van 55 en 60 jaar te vergoed sodat hulle op ­vervroegde aftrede kan gaan – sonder dat hulle benadeel word.

Hy sê die regering sal ook briek aandraai om vakante poste te vul en dat sommige nienoodsaaklike poste dalk gesluit kan word. Die minister sê indien daar nou geld bestee kan word om werknemers op vervroegde aftrede te stuur, sal die regering geld oor die lang termyn spaar.



KABINET

Die kabinet het aangedring 'n beperking word geplaas op hoeveel poste geskep kan word, asook dat die stelsel vir menslike ­kapitaalbestuur opgradeer moet word om sogenaamde “spookwerkers” uit te hou. Ander planne is om bonusse en ander toelae vaartbelyn te maak en ­vergoeding by die inflasiekoers te hou.

- [email protected]