Plaaslike toeriste bring N$6,3 miljard in

Francoise Steynberg - Die grootste rede waarom binnelandse toeriste in die land reis, is om vriende en familie te besoek.Dít is volgens die Plaaslike Toerisme Bestedingsverslag van 2015 wat verlede week deur die Namibië Toerismeraad (NTB) in samewerking met die ministerie van die omgewing en toerisme by die Namibië Toerisme Ekspo bekendgestel is. Plaaslike toeriste is ook in twee kategorieë ingedeel, naamlik dag- en oornagreisigers. Altesaam 1,2 miljoen oornagreisigers reis om vriende en familie te besoek en dit sluit troues en begrafnisse in, met 480 000 dagreisigers wat om dieselfde rede in 2015 gereis het.Dagreisigers reis meestal in skoolvakansies met piekperiodes tydens Paasnaweek, in die winter en Kersfees. Altesaam 60% van dagreisigers en 61% van oornagreisigers reis in die laaste helfte van die jaar. Die meeste oornagreisigers (55%) bly by vriende en familie en 24% bly in hul sogenaamde tweede huise. Sowat 12% bly in gedienste akkommodasieplekke en 5% elk in selfsorgeenhede of kampeerplekke. Die meeste oornagreisigers wat in gedienste akkommodasieplekke bly, is hier vir sake of konferensies en inkopies doen.Die gemiddelde duur van verblyf vir oornagreisigers is 5,4 nagte met die langste 7,7 nagte vir vakansies en die kortste 2,2 nagte vir inkopiereise. Hoe reis binnelandse toeriste? Altesaam 81% van dagreisigers reis met hul motorvoertuie, terwyl die res met busse en taxi's reis. Oornagreisigers reis ook meestal (71%) met hul motorvoertuie, terwyl 23% met busse reis. Plaaslike lugvervoer word net vir enkele reise (1,6%) gebruik, maar meestal vir sakereisigers wat konferensies bywoon. Waarheen reis Namibiërs? Wat dagreisigers betref, reis inwoners van die Noorde meestal na die Zambezistreek, Khomas-inwoners reis meestal na die Otjozondjupastreek, Erongo-inwoners reis meestal (43%) in hul eie streek en die meerderheid (52%) inwoners van die Suide reis na die Hardapstreek en 39% na Windhoek.Oornagreisigers van die Noorde reis meestal ook na die Zambezistreek. Khomas-inwoners wat oornag, reis graag na die Hardapstreek en Swakopmund is hul tweede gunsteling. Inwoners van Erongo en die Suide reis graag na Windhoek.AKTIWITEITE Die gewildste aktwiteite op dagreise is besoeke aan vriende en familie (34%), inkopies doen (31%), uiteet (17%) en sportbyeenkomste (17%). Besoeke aan vriende en familie is ook die gewildste aktiwiteit van oornagreisigers, gevolg deur inkopies doen (29%) en ontspanning (23%). Die aktwiteit wat die ongewildste is, is besoeke aan ’n casino. Hoeveel geld bestee binnelandse toeriste? Die gemiddeld wat op ’n dagreis bestee word, is N$993, maar oornagreisigers bestee slegs N$220 per dag. Die rede hiervoor volgens die verslag is dat die meeste oornagreisigers by vriende en familie bly en nie geld aan akkommodasie bestee nie. Sakereisigers bestee die meeste, sowat N$1 598 per dag, gevolg deur mense wat inkopies doen (N$1 042).Die algehele profiel van dag- en oornagreisigers is tussen die ouderdom van 25 en 44 wat 40% tot 45% van alle reisigers uitmaak. Oornagreisigers is egter jonger en een derde van oornagreisigers is jonger as 25 jaar oud. Mans reis ietwat meer met 51% dagreisigers en 48% van oornagreisigers wat manlik is. ’n Kwart van dagreisigers praat Afrikaans, 20% praat Oshiwambo en die teenoorgestelde met oornagreisigers: 27% praat Oshiwambo en 24% Afrikaans. Die meerderheid dag- en oornagreisigers (47%) was nog nooit getroud nie en meer getroude pare gaan op dagreise (38%) as wat hulle oornag (31%).

Plaaslike toeriste bring N$6,3 miljard in

Kommentaar

Republikein 2025-07-17

Meld asseblief aan om kommentaar te lewer

Plaaslike toeriste bring N$6,3 miljard in

Kommentaar

Republikein 2025-07-17

Meld asseblief aan om kommentaar te lewer

MELD AAN

Advertensie