Plaasaankope ‘is niemand se besigheid’

Denver Kisting – Die minister van verdediging, mnr. Penda ya Ndakolo, hou vol die ministerie het nié die plaas Otjisemba gekoop nie.Behalwe dat hulle nie tans geld daarvoor het nie, is dit in elk geval niemand se besigheid nie, sê hy.Me. Jennifer van den Heever, die hoofsweep van die amptelike opposisie, die Popular Democratic Movement (PDM), wou vroeër by Ya Ndakolo weet of daar waarheid in die bewerings steek.Dít kom nadat Republikein in Maart vanjaar onthul het die ministerie het die plaas vir N$24 miljoen bekom.Ten tye van dié bekendmaking het dit ook aan die lig gekom die grond is sonder die toestemming van die ministerie van finansies gekoop.Die minister van verdediging het Donderdagmiddag in die Nasionale Vergadering (NV) gesê: “Daar is geen inligting om te onthul nie, omdat die ministerie van verdediging nie die plaas Otjisemba gekoop het nie, want dit het nie tans geld om die plaas te koop nie.”Dit is wel belangrik om duidelik te stel die ministerie van verdediging, as ’n regseenheid, beskik oor dieselfde regte en verpligtinge as enige ander “om enige tipe bate of grond te koop wat nodig is in belang van die verdediging van ons land”, het hy voorts gesê.Sodanige reg is onderworpe aan die wetlike vereistes om grond te bekom, “van begroting tot die werklike transaksie van sulke ooreenkomste”, het hy toegegee.Maar, sê hy, “onder normale omstandighede benodig ’n ministerie nie die tesourie se verlof om grond te koop nie behalwe as daar nie vir die geld wat gebruik word, begroot is nie. As daar daarvoor begroot is en alle tendervereistes word nagekom, hoekom sou die tesourie se toestemming benodig word?”Hiernaas, sê die minister “dit is belangrik om te benadruk dat die ministerie van verdediging grond en bates bekom in oorleg met sy mediumtermyn- en strategiese doelwitte, wat die goedkeuring het van die Nasionale Beplanningskommissie (NPC) en deel uitmaak van die nasionale ontwikkelingsplanne vir Namibië.”Soos sake tans daar uitsien, is daar geen onmiddellike planne om die plaas te koop nie, sê hy. “Dis belangrik om opnuut te beklemtoon dat daar nie van die ministerie van verdediging verwag moet word om die doel en gebruik van elke stuk grond of bate wat hy koop, te verduidelik nie. Daar is regering- en nasionale liggame wat geregtig is op verdedigingsinligting en toegang word kragtens bestaande prosedures verleen.”Die minister se antwoorde is namens sy adjunk, mnr. Billy Mwaningange, voorgelees. Van den Heever het Donderdagmiddag gesê die antwoorde het haar stomgelaat, veral omdat die ministerie van verdediging nooit in die openbaar teen die koerantberigte kapsie gemaak het nie.Naas Otjisemba het die ministerie ook die aangrensende plaas Oropoka vir N$45 miljoen gekoop.

Plaasaankope ‘is niemand se besigheid’

Kommentaar

Republikein 2025-06-18

Meld asseblief aan om kommentaar te lewer

Plaasaankope ‘is niemand se besigheid’

Kommentaar

Republikein 2025-06-18

Meld asseblief aan om kommentaar te lewer

MELD AAN

Advertensie