Pitt dood gevind

Adolf Kaure op Swakopmund - Die lyk van die vermiste mnr. Ivan Pitt (29) is gisteroggend in die motorhuis van die moordhuis op Swakopmund ontdek waar me. Lindie Prinsloo (39) Vrydag wreed vermoor is.Pitt, Prinsloo se ekskêrel, wat sedert haar moord deur die polisie gesoek is, se lyk is gisteroggend deur haar vriend, mnr. Adam Labuschagne, gevind toe hy na 'n tafel in die motorhuis op soek was. Labuschagne het gesê Pitt het houtwerk gedoen en 'n kliënt wou weet of 'n tafel wat hy moes maak, gereed is. “Ek het van Walvisbaai af gery om te kyk of die tafel in die motorhuis is. Ek het die sleutels vir die motorhuis gekry en toe ek by die huis kom, het ek iets vreemds geruik. "Ek het gedog die reuk kom van die asblik af en dat dit dalk weens die bloed is nadat die huis ná die moord skoongemaak is," het hy vertel. Toe Labuscagne die motorhuisdeur oopmaak, het hy Prinsloo se Kia gesien en toe die lyk wat aan 'n tou van die dakbalk af hang.Labuschagne het ook Vrydag omstreeks 16:00 Prinsloo se sesjarige dogtertjie, Amelie, alleen in die huis saam met die lyk van haar ma met 'n oopgesnyde keel in 'n plas bloed gevind. PRINSLOOS BERUSOp 'n vraag oor hoe die Prinsloo-familie daaroor voel dat Pitt dood is, het die oorledene se jongste broer, mnr. Human Prinsloo (31), uit Outjo gesê "ons berus daarby”. “Ons het geen idee hoe erg die hel is nie," het hy aan Francoise Steynberg gesê. Prinsloo sê Pitt het seker geen ander uitweg gehad nie en hy voel jammer vir sy ma en familie. "Ten minste hoef ons nie meer oor Amelie se veiligheid bekommerd te wees nie."Op 'n vraag oor hoe dit nou met Amelie gaan, het Prinsloo gesê "sy is sterker as ons".Amelie het volgens Prinsloo vir haar ouma, me. Anita Prinsloo gevra: "Ouma, hoekom huil jy? Huil jy oor Mamma? Haar lyf is dalk dood, maar haar siel is by liewe Jesus en by ons.”Prinsloo het gesê sy broer in Kanada, Nico (33), sou gister vir 'n noodreisdokument aansoek doen om sy suster se begrafnis op Outjo by te woon.HUIS NIE BEWAAKBy die moordhuis het die polisielint Saterdagoggend slap gehang. Sondag omstreeks 18:00 was die polisielint weer styf gespan, het 'n inwoner van Vineta aan Republikein gesê."Die polisie moes dus weer intussen by die moordhuis gewees het. Waarom is die huis nie sedert die moord onder polisiebewaking geplaas nie?" word gevra. 'n Woordvoerder van die Namibiese polisie, hoofinp. Kauna Shikwambi, het bevestig die huis was nie onder polisiebewaking nie, omdat vermoed is Pitt het met die motor weggery."Die polisie het selfs gehoor die vermiste motor was in 'n ongeluk betrokke," het sy gesê.Pitt, die oorledene se motor en selfoon het sedert haar moord verdwyn en die polisie het 'n soektog van stapel gestuur om Pitt op te spoor en te ondervra. Die publiek is versoek om te help soek en Pitt se ma, me. Bridget Pitt, het 'n beroep op hom gedoen om homself aan die polisie oor te gee. Die nadoodse ondersoek kan moontlik bepaal wanneer presies Pitt gesterf het. Intussen is die polisie en Pitt se familie woedend oor 'n grufoto van sy lyk wat deur 'n weekblad op sosiale media geplaas en versprei is. Die polisie het daarná geweier om enige inligting oor die voorval te verskaf.BORGTOGAANSOEKPrinsloo het op 17 Augustus 'n beëdigde verklaring by Pitt se borgtogaansoek ingedien rakende die klag van huishoudelike geweld wat sy teen hom aanhangig gemaak het. Sy het aan die hof gesê die beskuldigde is haar voormalige kêrel en hulle was vir vier weke uitmekaar. “Ek wil hê borgtog moet aan die beskuldigde toegestaan word. Ek dink nie hy hou 'n bedreiging vir my lewe in nie en ek het hom in die tronk gaan sien. Hy het verskoning gevra en ingestem om berading te kry om sy woede te bestuur.”Die hofrekord dui aan Prinsloo het aan die hof gesê die beskuldigde het haar nie aangerand nie en het met haar probeer praat.“As ek nie na hom geluister het nie, het hy 'n mes gevat en dit teen my keel gedruk om my te laat luister. Ek is nie meer bang vir hom nie."Daar is geen voorwaardes wat ek voorstel nie, want ons moet steeds saamwerk. Hy sal nie na my huis toe kom nie, maar ek wil nie hê dit moet 'n hofbevel wees nie. Ek glo hy sal doen wat hy sê."

Pitt dood gevind

Kommentaar

Republikein 2026-05-06

Meld asseblief aan om kommentaar te lewer

Pitt dood gevind

Kommentaar

Republikein 2026-05-06

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.