Pipcoin-baas mik na Namibië
Die skepper van die kriptogeldeenheid Pipcoin beplan om dit in Namibië bekend te stel.
Ronelle Rademeyer en Jo-Maré Duddy - Die selfverklaarde Johannesburgse miljardêr, FX-verhandelaar en skepper van Suid-Afrika se eerste kriptogeldeenheid bekend as Pipcoin, het sy oog op Namibiese beleggers.
Mnr. Refiloe Wayne Nkele (22), of Ref Wayne soos almal hom noem, het reeds sy boek, The Art of Trading, by die Hilton Hotel in Windhoek bekend gestel. Sy volgende stap is ’n seminaar in Maart in die land om sy skema hier bekend te stel.
Groot gewag word op sosialemediaplatforms soos Instagram en Facebook hiervan gemaak. Die Namibiese Big Brother-ster, Dillish Mathews, sê in ’n plasing waar hulle saam op ’n foto verskyn, Namibiërs moet hulle vir hierdie groot gebeurtenis gereed maak.
Ref Wayne is die meesterbrein agter die FX-verhandelingstelsel en Pipcoin-skema Armageddon, wat beleggers waarborg dat hulle miljoenêrs kan word. Hy is ook die stigter van die African Forex Institute (AFI).
Volgens iol.co.za het hy dié skema in 2016 bekend gestel en glo reeds N$200 miljoen se beleggings ontvang. Hy belowe maandelikse opbrengste van 35% hierop.
Dié 22-jarige swierbol beskryf homself op LinkedIn as ’n FX-spesialis, skrywer en filantroop. Volgens sy profiel op who’swho.co.za het hy ’n blue chip-agtergrond, is hy as die uitvoerende hoof van SuperBrain (ook een van sy ondernemings) “die beste van die beste” en beskik hy oor vaardighede in kunsmatige intelligensie, kwantumfisika en sielkunde.
Verder blyk dit uit dié profiel dat hy in 2010 en 2011 sy eerste werksondervinding as ’n internetbemarker by Telport opgedoen het. Dit beteken hy was 15 jaar oud toe hy daar begin werk het.
PONZI-SKEMA
Republikein het gister met mnr. Shane Maguire, ’n Bitcoin-kenner en redakteur van BitcoinHub.co.za, oor Pipcoin gesels. Hy het ’n ondersoek na die skema ingestel en beleggers gewaarsku dat dit ’n bedrogspul is.
Hy sê sy ondersoek het gewys Pipcoin is as ’n Ponzi-skema begin. “Dit was ’n kloon van die internasionale Ponzi-skema, MMM Global.
“Hy (Ref Wayne) het ’n webtuiste soortgelyk aan dié van MMM Global geskep. Daar was egter geen kriptogeld daaragter wat die beleggings gesteun het nie,” sê Maguire.
“Hulle het dit later verander en na ’n werklike kripto-eenheid oorgeskakel.”
Volgens hom is daar egter nie waarde in hierdie eenheid nie.
“Die vrystelling het nie stelselmatig geskied soos transaksies plaasvind nie. Dit was van die begin af vrylik beskikbaar en die stigters kon soveel as wat hulle wou vir hulself skep. Daar is geen deurstigtigheid in hoe dit versprei word nie,” verduidelik Maguire.
Mnr. Dylan van Wyk, ’n analis by Cirrus Capital in Windhoek, sê enigiemand kan sy eie kriptogeldeenheid skep. Die waarde ontstaan eers wanneer genoeg mense dit gebruik, soos in die geval van Bitcoin.
“In Pipcoin se geval is daar nie ’n vaste voorraad nie. Hulle kan skep soveel hulle wil en dit verkoop teen ’n prys wat hulle wil.”
BANK OF NAMIBIA
Die Bank of Namibia (BoN) het in September 2017 gesê dit erken nie kriptogeldeenhede as ’n wettige betaalmiddel in die land nie.
Die sentrale bank het ’n dokument vrygestel waarin dit duidelik gestel word dat kriptogeld nie in Namibië gereguleer word nie. Individue wat daarin verhandel, doen dit op hul eie risiko, het die BoN gesê.
“Virtuele geldeenhede word as onveilig beskou vir gebruikers wat onbewus is van die risiko wat dit inhou. Dit sluit krediet-, likiditeits-, bedryfs- en wetlike risiko’s in,” het die BoN gesê.
Die BoN het die publiek voorts teen die risiko’s van geldwassery en die finansiering van terrorisme gewaarsku sou hulle in kriptogeldeenhede verhandel.
Nkele, of Ref Wayne, kon nie vir kommentaar bereik word op die selfoonnommer wat op die internet as sy kontaknommer gelys word nie. Volgens die diensverskaffer bestaan die nommer nie.
Mnr. Refiloe Wayne Nkele (22), of Ref Wayne soos almal hom noem, het reeds sy boek, The Art of Trading, by die Hilton Hotel in Windhoek bekend gestel. Sy volgende stap is ’n seminaar in Maart in die land om sy skema hier bekend te stel.
Groot gewag word op sosialemediaplatforms soos Instagram en Facebook hiervan gemaak. Die Namibiese Big Brother-ster, Dillish Mathews, sê in ’n plasing waar hulle saam op ’n foto verskyn, Namibiërs moet hulle vir hierdie groot gebeurtenis gereed maak.
Ref Wayne is die meesterbrein agter die FX-verhandelingstelsel en Pipcoin-skema Armageddon, wat beleggers waarborg dat hulle miljoenêrs kan word. Hy is ook die stigter van die African Forex Institute (AFI).
Volgens iol.co.za het hy dié skema in 2016 bekend gestel en glo reeds N$200 miljoen se beleggings ontvang. Hy belowe maandelikse opbrengste van 35% hierop.
Dié 22-jarige swierbol beskryf homself op LinkedIn as ’n FX-spesialis, skrywer en filantroop. Volgens sy profiel op who’swho.co.za het hy ’n blue chip-agtergrond, is hy as die uitvoerende hoof van SuperBrain (ook een van sy ondernemings) “die beste van die beste” en beskik hy oor vaardighede in kunsmatige intelligensie, kwantumfisika en sielkunde.
Verder blyk dit uit dié profiel dat hy in 2010 en 2011 sy eerste werksondervinding as ’n internetbemarker by Telport opgedoen het. Dit beteken hy was 15 jaar oud toe hy daar begin werk het.
PONZI-SKEMA
Republikein het gister met mnr. Shane Maguire, ’n Bitcoin-kenner en redakteur van BitcoinHub.co.za, oor Pipcoin gesels. Hy het ’n ondersoek na die skema ingestel en beleggers gewaarsku dat dit ’n bedrogspul is.
Hy sê sy ondersoek het gewys Pipcoin is as ’n Ponzi-skema begin. “Dit was ’n kloon van die internasionale Ponzi-skema, MMM Global.
“Hy (Ref Wayne) het ’n webtuiste soortgelyk aan dié van MMM Global geskep. Daar was egter geen kriptogeld daaragter wat die beleggings gesteun het nie,” sê Maguire.
“Hulle het dit later verander en na ’n werklike kripto-eenheid oorgeskakel.”
Volgens hom is daar egter nie waarde in hierdie eenheid nie.
“Die vrystelling het nie stelselmatig geskied soos transaksies plaasvind nie. Dit was van die begin af vrylik beskikbaar en die stigters kon soveel as wat hulle wou vir hulself skep. Daar is geen deurstigtigheid in hoe dit versprei word nie,” verduidelik Maguire.
Mnr. Dylan van Wyk, ’n analis by Cirrus Capital in Windhoek, sê enigiemand kan sy eie kriptogeldeenheid skep. Die waarde ontstaan eers wanneer genoeg mense dit gebruik, soos in die geval van Bitcoin.
“In Pipcoin se geval is daar nie ’n vaste voorraad nie. Hulle kan skep soveel hulle wil en dit verkoop teen ’n prys wat hulle wil.”
BANK OF NAMIBIA
Die Bank of Namibia (BoN) het in September 2017 gesê dit erken nie kriptogeldeenhede as ’n wettige betaalmiddel in die land nie.
Die sentrale bank het ’n dokument vrygestel waarin dit duidelik gestel word dat kriptogeld nie in Namibië gereguleer word nie. Individue wat daarin verhandel, doen dit op hul eie risiko, het die BoN gesê.
“Virtuele geldeenhede word as onveilig beskou vir gebruikers wat onbewus is van die risiko wat dit inhou. Dit sluit krediet-, likiditeits-, bedryfs- en wetlike risiko’s in,” het die BoN gesê.
Die BoN het die publiek voorts teen die risiko’s van geldwassery en die finansiering van terrorisme gewaarsku sou hulle in kriptogeldeenhede verhandel.
Nkele, of Ref Wayne, kon nie vir kommentaar bereik word op die selfoonnommer wat op die internet as sy kontaknommer gelys word nie. Volgens die diensverskaffer bestaan die nommer nie.
Kommentaar
Republikein
Geen kommentaar is op hierdie artikel gelaat nie