Perde onder die patriotte

Adolf Kaure in Swakopmund en Toivo Ndjebela (Namibian Sun) – 'n Gewilde opposisiepolitikus van Swakopmund sê sy is geskors omdat sy teen 'n verdagte kollega op Hentiesbaai wou optree, maar soos dikwels tevore ontken die Independent Patriots for Change (IPC) die hernude tweespalt in sy geledere.Haar verblyf in Walvisbaai eerder as die kiesafdeling wat sy verteenwoordig, is bygeroer in die pot van onmin.Me. Ciske Howard, voorsitter van die Erongo-streekraad, het haar skorsing aan Erongo bevestig.Volgens Howard is die besluit Woensdag geneem tydens 'n vergadering in Windhoek met die party se president, dr. Panduleni Itula.“Ek is oor 'n klein sakie geskors en hulle het nie prosedures gevolg nie,” voer sy aan. “Dit is magsmisbruik en baie outokraties.“Ek het 'n dissiplinêre verhoor belê vir die bestuurskomiteelid van Hentiesbaai se dorpsraad, mnr. Siegfried //Garoeb,” lui haar verduideliking. Volgens die party het sy nie toestemming vir die optrede gehad nie.//Garoeb is in 2018 by die munisipaliteit aan N$61 000 se bedrog skuldig bevind en is vir wanbestuur afgedank; voordat hy voor 2020 se streek- en plaaslike owerheidsverkiesings by die IPC aangesluit het.In een van die mees onlangse openbare twiste in die IPC het mnr. Fillemon Hambuda as lid van Windhoek se stadsraad bedank terwyl me. Desiree Davids, 'n medestadsraadlid, haar skorsing uitgedaag het.Ook Howard het gister die hakke ingekap.“Die skorsing is onregverdig teenoor kiesers,” sê sy.Mnr. Knowledge Ipinge, voormalige onafhanklike streekraadslid vir Walvisbaai, het die optrede teen Howard verwerp as in stryd met die party se grondwet.“Die ongrondwetlike skorsing deur die hoofdiktator en skynheilige [Itula] hou geen water nie,” het hy gesê. “Die bal is nou in die party se baan, wat dalk 'n tussenverkiesing wil hê. Inwoners van Swakopmund moet die sitplekgordels vasmaak want ons nader die grondpad,” het die uitgesproke kritikus van Itula op Facebook aangeraai.Soos dikwels weet die partyleier van geen sout of water nie. “Ek weet nie van enigiemand wat deur die IPC geskors is nie,” was sy reaksie.Volgens die IPC se woordvoerder, mnr. Imms Nashinge, het die IPC nie vir Howard op enige manier gestraf nie. “Ons het niemand geskors nie, maar ons sal voor die einde van die dag onsself oor die kwessie uitspreek,” was sy reaksie.In die Namibian Sun se geselsprogram Evening Review het Howard gister aangevoer Itula het 'n outokraat geword en is 'n skaduwee van die man wat duisende na politieke vergaderings gelok het toe hy pres. Hage Geingob as onafhanklike kandidaat by die stembus uitgedaag het.Itula heers volgens Howard met 'n ystervuis op grond van sy grille en giere.Howard het erken sy het emosioneel geraak in 'n WhatsApp-groepsgesprek met die partyleierskap.“Ek dink net die IPC kan nie toelaat dat 'n amptenaar wat afgedank is nou in beheer van 'n raad is nie,” het Howard gesê. “Dit is eenvoudig 'n kwessie van [goeie] bestuur.”Volgens Howard is die kwessie van haar verblyf met die streekraad uitgeklaar.Wenkbroue het glo ook gelig oor die feit dat sy haar man se CV vir 'n direkteurspos by die kragverspreider Erongo RED ingehandig het.“Hy is gekwalifiseerd vir die posisie,” het Howard aan Evening Review gesê. “Een van die mees gekwalifiseerde [persone].”Volgens 'n “ontgogelde en teleurgestelde” Howard is sy ook van rassisme beskuldig. “Dit kon ek nie toelaat nie,” het sy benadruk.In Windhoek was ook omstredenheid toe die IPC mnr. Jürgen Hecht in Hambuda se plek as stadsraadlid ingesweer het terwyl me. Rozelda Somses volgende op die partylys was. Sy het daarna uit die party bedank.Volgens 'n interne skrywe is Howard geskors weens onbetaamlike gedrag en omdat sy nie “normaalweg” in Swakopmund tuisgaan nie.FOTO’sMe. Ciske HowardDr. Panduleni Itula

Perde onder die patriotte

Kommentaar

Republikein 2025-08-04

Meld asseblief aan om kommentaar te lewer

Perde onder die patriotte

Kommentaar

Republikein 2025-08-04

Meld asseblief aan om kommentaar te lewer

MELD AAN

Advertensie