Pensioenaris se lidmaatskap opgeskort

Henriette Lamprecht – Juis in die tydstip van hul lewe wanneer hulle mediese dekking die nodigste het, word hulle sonder dit gelaat. So het ’n vrou gereageer wie se 82-jarige ma een van duisende pensioenarisse is wat van die staat se mediese fonds (Psemas) afgehaal is.Die voormalige minister van finansies, mnr. Calle Schlettwein, het vroeër vanjaar in die parlement gesê Psemas het die voordele van meer as 17 000 staatsamptenare en pensioenarisse se afhanklikes opgeskort wat die ouderdomsbeperking vir dekking oorskry het. Volgens die vrou het haar ma geen kennisgewing ontvang dat haar lidmaatskap opgeskort gaan word nie en het sy eers daarvan bewus geraak toe sy haar chroniese medikasie gaan afhaal het.Schlettwein het egter gesê die ministerie het kennisgewings in die media geplaas.Volgens die vrou was haar pa voor onafhanklikwording werksaam by die ministerie van onderwys. “My ma moet nou bewys my pa was tot 1990 én daarna in die onderwys. Hy is in 2008 oorlede; waar kry ons nou hierdie dokumente?”Volgens haar was die besluit om haar ma se lidmaatskap te beëindig volgens “’n opdrag van bo om alle oorledenes se afhanklikes onmiddellik te verwyder”.“Sy is op die tyd van haar lewe waar sy mediese dekking die nodigste het, waar kry jy nou vir haar medies? As ons haar op ander mediese fondse wil sit, gaan dit N$4 300 en N$5 000 per maand kos uit die N$10 000 se pensioen wat sy elke maand kry.”Die verifikasie van lede en afhanklikes het reeds in 2008 begin in ’n poging om die fonds meer vaartbelyn en kostedoeltreffend te maak. Teen Maart vanjaar is die voordele van 17 730 afhanklikes gestaak wat oor die ouderdomsbeperking was. Volgens Psemas se reëls geld dit vir alle afhanklikes wat 21 jaar en ouer is, buiten wanneer die afhanklike steeds studeer. In laasgenoemde is die ouderdomsbeperking 25 jaar en moet die afhanklikes jaarliks bewys kan lewer van registrasie by die lid se werkgewer. Lede wie se mediesefondspremies drie maande of meer agterstallig is, sowel as dié wat hul pensioen van die staat se pensioenfonds (GIPF) onttrek het, se lidmaatskap sowel as die van hul afhanklikes word ook opgeskort. Volgens die ministerie se woordvoerder, mnr. Tonateni Shidhudhu, is 95% van afhanklikes se besonderhede tydens die eerste fase van die verifiëringsproses gekontroleer en is die wat nie aan die vereistes voldoen nie, van die stelsel verwyder. Net 75% van hooflede is reeds geverifieer en die wat nie aan die vereistes voldoen nie, is afgehaal. Dié proses duur nog voort. Alle afhanklikes wat 21 geword het en nie hul bewys van registrasie vir die huidige akademiese jaar voorgelê het nie, is volgens Shidhudhu deur Psemas se administrateur Methealth op hul 21ste verjaardag van die stelsel verwyder. Dit sluit ook die in wat ouer as 25 jaar is en nie geestelik of fisiek gestrem is nie. Volgens hom kan die wat geestelik of fisiek gestrem en 25 jaar oud is op die stelsel bly, mits daar ’n bewys in die vorm van ’n brief van die ministerie in die presidensie verantwoordelik vir geslagsgelykheid, armoede-uitwissing en maatskaplike welsyn is dat hulle as begunstigdes van maatskaplike toelaes geregistreer is. Dit moet van ’n doktersverslag vergesel word. “Pensioenarisse wat nie hul bydraes betaal het nie, is afgehaal en laat weet hulle is agterstallig. Die oomblik wanneer die bedrag vereffen is, sal hulle weer geregistreer word,” het hy gesê.Shidhudhu sê die regering het ’n projek begin om Psemas te hervorm en waarvan die uitkoms daarvan teen die einde van die 2020-’21-finansiële jaar sal wees. ’n Deel van die projek sluit in ’n herevaluering van Psemas se reëls en voordelestruktuur, asook die mediese fonds se bestuurstruktuur en fiskale volhoubaarheid. Die verifiëring van pensioenarisse se lidmaatskap het gewys meer as 42 000 lede was agter met hul mediesefondspremies wat sowat N$8,3 miljard beloop het. Tot op hede is N$3,1 miljard herwin. – henriette@republikein.com.na

Pensioenaris se lidmaatskap opgeskort

Kommentaar

Republikein 2025-05-06

Meld asseblief aan om kommentaar te lewer

Pensioenaris se lidmaatskap opgeskort

Kommentaar

Republikein 2025-05-06

Meld asseblief aan om kommentaar te lewer

MELD AAN

Advertensie