Pennielose NSV stuur spelers na Senegal

Die Namibiese Sokkervereniging (NSV) het gister opnuut die regering genader om hom uit sy penarie te red dat die Brave Warriors klaarblyklik wou staak.
Die NSV skuld sy nasionale spelers nou reeds ’n geruime tyd geld en het die Namibiese Sportkommissie asook die direktoraat van Sport genader om aan die spelers te verduidelik dat hulle onmiddellik betaal sal word sodra die NSV geld van die regering ontvang het.
Mnr. Barry Rukoro, sekretaris-generaal van die NSV, sê dié stap was nodig om die spelers gemoedsrus te gee voordat hulle vandag na Senegal vertrek.
Nuus oor die noodvergaderings het vinnig versprei toe die Warriors gisteroggend nie met hul oefensessie wou begin voordat uitklaring oor die geldelike stand van sake verkry is nie.
Namibië speel komende Saterdag ’n kwalifiserende wedstryd vir die Konfederasie van Afrika-sokker (CAF) se 2017 Afrika Nasiebekerbekertoernooi. Die Brave Warriors is reeds uitgeskakel in die kwalifiserende wedloop.
“Hierdie spelers word ’n klomp geld geskuld vir wedstryde wat gespeel is en dit het nou al hoe moeiliker vir ons geword om vir hulle dieselfde storie te vertel. Ons het nog nie geld van die staat ontvang nie, dus was dit my verantwoordelikheid om mnre. Walter Haseb en Sivhute Katamba te nooi sodat hulle aan die spelers kan verduidelik wat aan die gang is,” het Rukoro gesê.
“Van dié spelers stap ’n pad met die NSV vandat hulle 15 jaar oud was.
“Ditkan nie vir hierdie spelers maklik wees nie, maar ek moet hulle komplimenteer vir die manier hoe hulle die hele ding tot dusver hanteer het. Dit is ’n voorbeeld vir almal. Hulle het begrip vir die situasie en sal (vandag) na Senegal vertrek om hul land te verteenwoordig,” het die sokkeradministrateur verduidelik.
Die Brave Warriors het nie meer ’n kans om in die 2017 Afcon te speel nie. Hulle is tans in die derde posisie in groep K, terwyl Senegal met 15 punte die voorloper is.
Vanweë ’n geldtekort kon Namibië ook nie verlede week na Pretoria reis vir ’n voorbereidende kamp by die hoëprestasie-sportsentrum nie.
“Ek is nie gelukkig met ons voorbereiding vir Saterdag se botsing nie, ons sal professioneel moet bly en die bul by die horings moet pak. Dit is ons as afringting- en bestuurspan se verantwoordelikheid om die spelers geestelik reg te kry en te motiveer,” het afrigter Ricardo Mannetti gesê.
Vandeesweek moes kaptein Ronald Ketjijere en Peter Shalulile vanweë beserings van die toergroep onttrek.
Die spelersgroep na Senegal is: Max Mbaeva (Golden Arrows), Virgil Vries (Maritzburg United), Da Costa Angula (geen klub), Chris Katjiukua (Golden Arrows), Ferdinand Karongee (Tigers), Tiberius Lombard (Tura Magic), Edmund Kambanda (Unam), Oswaldo Xamseb (Tura Magic), Deon Hotto (Bloemfontein Celtic), Hendrick Somaeb (geen klub), Petrus Shitembi (geen klub), Absalom Iimbondi (Tigers), Larry Horaeb (FNB Black Africa), Ananias Gebhardt (Jomo Cosmos), Wangu Gome (Bidvest Wits), Benson Shilongo (Platinum Stars), Dynamo Fredericks (Black Africa) en Itamunua Keimuine (Tura Magic).